Mopanday sa bag-ong Constitution
Naglaraw si Presidente Rody Duterte sa pagtudlo sa 24 ka commissioners nga mopanday sa usa ka bag-ong Constitution ug mag-usab sa sistema sa gobiyerno ngadto sa pederalismo aron maundang na ang Moro secessionist rebellion sa Mindanao.
Nakahinumdom si Duterte nga si kanhi Pres. Corazon Aquino nitudlo sa 50 ka mga sakop sa komisyon nga nagpanday sa 1987 Constitution.
Ang bag-ong Batakang Balaod giaprobahan sa plebisito ug nihulip sa 1973 Constitution nga gipakanaog usa ka tuig human gideklarar ni Pres. Ferdinand Marcos ang martial law.
Sa iyang pakigpulong atubangan sa mga magpapatigayon sa siyudad sa Mandaluyong niadtong Miyerkules sa gabii, ang presidente niingon nga dako ang magasto sa pagpatawag og usa ka constitutional convention (Con-Con) kay magpili og duha ka delegado sa matag distrito nga dunay tagsa-tagsa ka opisina ug staff .
“Now, do not tell me that the composition of that constitutional body would be wiser, would be more honest, and would not be protecting a vested interest,” matod pa niya.
Apan gitugotan ba sa atong 1987 Constitution nga usbon kini pinaagi lang sa usa ka Constitutional Commission?
Si Chief presidential legal counsel Salvador Panelo namahayag nga tingali ang nahunahunaan sa presidente mao ang pagtudlo og usa ka advisory body nga maoy morekomendar sa pag-amendar sa 1987 Constitution apan aprobahan kini sa Kongreso isip usa ka constituent assembly (con-ass).
Ang presidente miluwat og usa ka executive order nga nagmugna sa usa ka “consultative committee” nga morepaso sa 1987 Constitution.
Ang gitugotan nga paagi sa pag-usab sa Batakang Balaod mao ang Con-Con ug ang conass. Ang katawhan mahimo usab nga mosugyot og mga kausaban sa konstitusyon pinaagi sa makuti nga People’s Initiative.
Si Senate Minority Leader Franklin Drilon niingon nga ang Kongreso lang isip usa ka constituent assembly o constitutional convention ang makausab sa entirong 1987 Constitution ug isumitir sa usa ka plebisito.