Koleksyon

Pagkabasa nako sa balita mahitungod atong kawat sa simbahan sa Mabolo bag-ohay lang, wa na kaayo ko nahibung. Dili na bag-o nang naay manguha sa koleksyon sa misa, ug dili na bag-o nga ang manguha taga kombento ra sab. Kinsa man guy magkinawatay di ba kita-kita ra man?

Bisan ang kantidad nga P400,000 dili kaayo angay’ng ikakurat, kay kon buot hunahunaon, gamay ra ni kon dagkong parokya na ang hisgotan, sama sa Mabolo.

Ma- imagine lang nimo ang Sto. Rosario o Guadalupe o Cathedral. Sa kadaghan sa manimba ug magpamisa dinhi, minilyon tingali ang kantidad nga atong hisgotan matag Dominggo.

Sweto kog gamay ining mga butanga kay pila sab ko katuig nga seminarista, wa pay labot atong bata pa ko nga nahimo sab kong sakristan. Isip mga seminarista, i- assign mi sa nagkalain-laing parokya sa Sugbo aron motabang sa mga gimbuhaton sa simbahan matag weekend. Magtudlo mig choir, mag- organize mi sa mga batan-on, mag- Bible sharing uban ang mga parokyano, ug inig Dominggo, mo- assist sa pari sa misa. Ang misa ang pinaka- highlight nga activity sa parokya. Inig human sa misa, libre na mi, magtambay sa kombento, magtsika-tsika sa pari, ug kon magkalisod, magtagay.

Ug dinhi pud inig human sa misa namo mahibaw-an unsa kadako (o unsa kagamay) ang nakolekta anang Dominggoha kay usahay kami man ang sugoon sa pari pag-ihap sa kwarta: Diri itapok ang tigmanggatos, didto ang tigsingkwenta, diri ang tigbaynte, ug pasagdi nang mga sinsiyo diha, nagbug-at bug-at lang na sa sibot.

“Kining mga tiglibo, father, asa ni ibutang?” nangutana ko sa pari kausa. “Diretso na nako,” mitubag si father.

Naa puy usahay nga di mi kakupot bisag sa sinsiyo kay ang taga parish pastoral council (PPC) man ang mangunay og ihap. Kasagaran mahitabo ni sa mga parokya nga empowered kaayo ang PPC, sila ang in-charge sa mga galastoanan sa parokya ug hatagan lang nilag allowance ang pari.

“Lamia iinom oy, tagay ta na,” ingon ang pari sa gamay nga parokya diin ko na- assign. “Sige father, wa na bitaw tay buhaton,” mitubag ko. Mikuot si father sa iyang pitaka ug mikunot ang agtang kay wa ni sulod.

“Kuhaa tong tigsingkwenta didto, ipalit og beer,” gisugo kong father.

Misulod ko sa kwarto sa pari, midiretso sa lamesa nga gibutangan sa kolekta ug nahibong kay wa na didto ang mga tigsingkwenta nga maayo kaayo namong pagka- file ganina. Dayon nakong gawas, mikuha kog usa ka gatos ug gisulod sa akong bulsa.