GOLD LUCK, JOY
Tabal nagpanikad na nga molabni sa gold karong adlawa
Gilaumang ipagawas ni Cebuana Olympian Mary Joy Tabal ang tanan niyang nakamahuan sa hugot nga pagbansaybansay sa gawas sa nasod sa iyang pagdagan karong adlawa sa
women’s marathon event sa 29th Southeast Asian (Sea) Games sa Kuala Lumpur, Malaysia. “As of this moment, I’m nervous, excited and I’m hopeful,” matod ni Tabal sa interbyu sa SunStar Cebu, igsuong mantalaan sa Superbalita Cebu. Ang 28 anyos nga marathoner hugot nga nagbansaybansay sa Tuscany Training Camp sa Italy tulod sa tulo ka
mga buwan sa tinguha nga iyang mapalabwan ang silver
medal nga iyang nabira sa 2015 edition sa kompetisyon sa Singapore.
Nagbansaybansay sab si Tabal sa bukirang basin sa St. Moritz, Switzerland sulod sa tulo ka mga semana.
Ikaparang ni Tabal ang nag-unang
marathoners sa southeast asia 42kilometer nga lumba nga sugdan sa alas 6:15 sa buntag.
Si Tabal, kinsa sakop sa Motor-Ace Kawasaki Racing Team, miabot sa Malaysia niadtong Miyerkules. Ang kanhi sprinter sa Southwestern University nahilakip sa mga gilauman nga makahatag og gold medal sa Pilipinas sa matag duha ka mga tuig nga kompetisyon. Ang Pilipinas nakaangkon na og silver medal gikan sepak takraw ug bronze medal gikan sa archery niadtong Miyerkules. “We have visited the start and finish area, but we haven’t checked the entire course,” dugang ni Tabal. Kagahapon sa buntag naka-eskedyul ang mga partisipante sa pagsusi sa kinatibuk-ang rota sa lumba.
“Based on race route photo the route is flat, there’s a bridges that has a small hill. I’m fine with looping, what’s important is we have to check it so we can familiarize the road,” dugang ni Tabal.
Ang labing maayong oras nga natali ni Tabal mao ang 2:43:31 niadtong Mayo sa miaging tuig sa Ottawa Marathon nga maoy nagpa- qualify kaniya sa Oympics.
Sa iyang pagsakmit og silver medal niadtong 2015 sa SEAG, si Tabal mitali og oras nga 3:04:39.