Bahala’g saging basta loving

Namungingi sa nagkadaiyang klase ug humot nga saging gikan sa iyang mga bisita ang lawak ni Marie dihang na-admit siya sa ospital human kalit nanglapoy ug nawad-an og umoy.

Nagtuo iyang mga kauban sa buhat nga gi-ataki siya apan matod sa doktor nga nag-atiman niya, mi-ubos pag-ayo ang potassium sa iyang lawas nga maoy naka-ingon sa iyang kahimtang.

Pulong sa doctor, usa sa dakong makatabang para siya maulian mao ang pagkaon og saging kay taas kini og potasium nga makapabalik sa iyang kahimsog ug makapadugang sa enerhiya.

Kining saging nga nagsugod og tubo sa Africa gitawag og ‘banana’. Gawas nga lamian kining lutoon sama sa pinaypay, toron, banana cue, minatamis, fruit salad ug banana cake, kining prutasa daghan sab og bitamina ug mineral nga wala kaayo mahibaw-i sa kadaghanan.

Sumala sa Read & Digest nga basahon, ang saging taas og potassium nga makatabang sa paghatod og oxygen ngadto sa utok ug pagmintinar sa normal nga pitik sa kasing-kasing. Motabang sab kini pag-balansi sa tubig sulod sa lawas maong da best kini pag-paubos sa risgo sa stroke, paubos sa pressure sa dugo og maka palahos sa daloy sa dugo tibuok lawas.

Makahatag sab kini og daghang bitamina (B, B1, C, A1,B6 og B12), mineral ug natural nga enerhiya maong ang maluya, kapuyon ug maughan seguradong maulian kung mokaon bisag duha lang ka buok ini.

Kung maglisod sab pagpa-gawas sa hugaw, ang saging taas og fiber nga makapa-uli sa normal nga kalibang apan dili maka-ingon sa diarrhea.

Makapaminus sab kini sa hang- over labi na kon ubayubay ang nainom nga ilimnong makahubog. Suwayi og kaon og duha ka buok ini inig mata sunod ugma ug makita nimo ang kalainan kay mabalik naman sa normal.

Ang saging makapaminus sab sa acid sulod sa tiyan kay motabang man kini pagtabon sa panit sulod sa tinai maong mapalayo sa ulcer.

Kini ug daghan pa ang mga benebisyo nga makuha gikan sa punuan, dahon, putot ug prutas maong motuo ko sa panultihon nga ‘bahala’g saging basta loving’.