Isuwat sa bato ang kinabuhi mo
ERNESTO D. LARIOSA San Fernando, Cebu
Lapad nga bato diha isuwat ang kinabuhi mo Lawoma gyud sa pagkulit sa imong kamot Bisan ang hata sa wa mobuswak nga pangandoy Kay gitan-aw lamang gisalindot ang katahom Sa gugma ug ang halad unta sa kamatuoran. Sa gihapon ipatik sa bato lakip ang mga anino Sa daghang mga damgo mo nga wa matuman Tagda gihapon sa mga titik ang mga tunob Nga nanglakra sa suwang sa nawong sa panganod Nga gitukmod sa hangin sa wa nay pagbalik Kay silang tanan mga agiw sa kasaysayan Nga angayng banhawon nga salamin sa umaabot: Giunsa mo sa pakig-asdang ang kaugalingon Sa pakigbatok sa mga hagit nga gipangbugno Sa napino-pino mong mga pagsulay Kay kana ang giingong palad mong nanglagom Tin-awng mibungbong sa imong kalibutan karon. Higala, isuwat gihapon sa bato ang panagsa Mong mga talidhay aron ang makabasa Diha-diha matakdan sad sa pagpahiyom.