Baha bag-ong normal

Niadtong Huwebes sa gabii, maorag sapa ang kadaghanan sa mga karsada sa dakbayan sa Sugbo ug tipik sa Mandaue City. Mga usa ka semana ang milabay sukad usab gibahaan ang kinapusoran sa dakbayan sa Talisay dihang nagbunok usab ang uwan. Daling mabasol ang gagmay ug nasampungan usab nga mga drainage system.

Nasampungan ang mga drainage sa daghang mga basura nga makita kaayo daplin sa kadalanan. Dugay na kini nga suliran apan bisan pag hakuton kining tanan, basta di mag-usab ang katawhan sa ilang batasan sa paghipos sa basura, way drainage system nga paigo.

Apan ang usa sa mga hinungdan sa pagbaha nga di makita mao ang global warming. Tungod sa global warming, kalitkalit nga mag-usab-usab ang panahon. Dali rang makauwan bisan sa daklit, naglagiting ang kainit.

Daan nang nipasidaan ang mga sayantipiko nga panagan-an na ang kusog nga bagyo, pagdahili sa yuta ug kalit nga mga pagbaha tungod sa global warming.

Bisan gani ang ting-init kaniadto, nahimo nang ting-uwan samtang ang ting-uwan, ting-init. Lisod na tag-anon ang panahon.

Di lang kay kini nasinati lang sa Pilipinas, kon di sa tibuok kalibutan. Ang wa maigo kaniadto og huwaw, nakasinati na. Ang mga dapit nga bugnaw ray nailhan sa mga tawo, gihasi sa tumang kainit nga niresulta sa mga kamatayon.

Busa di kita angay pang mahibung kon sa kalit lang, kon dunay kusog nga pagbunok sa uwan, ubanan kini sa talagsaong baha. Kay gawas sa paspas nga urbanization, nia na ang global warming.

Mao na ni ang bag-ong normal nga atong pagapuy-an sa umaabot pang katuigan. Ug angay na kitang maanad niini nga ang kahimtang nato karon, mag-anam og kalisod.