NADAKPAN.

SuperBalita Cebu - - PORTADA -

Si Henry Punay, 57, taga Brgy. San Jose, dakbayan sa Sugbo nakuhaan og high powered nga mga armas sama sa KG 9 ug mga bala. Si Punay nga negusyante og construction material nangangkon nga agent sa Military Intelligence Group (MIG).

Nagpailang sakop sa Military Intelligence Group nasikop sa Criminal Investigation and Detection Group-7 pasado alas 6 kagahapon sa buntag pinasikad sa search warrant nga giluwatan sa korte.

Ang CIDG-7 armado og search warrant nga giluwatan ni Judge Antonio Marigomen sa RTC branch 61 sa dakbayan sa Bogo batok kang Henry Punay, 57, taga barangay San Jose,siyudad sa Sugbo.

Si Punay negosyante og construction materials apan gireklamo sa mga residente nga magdala-dala og armas nga giangkon usab sa suspek.

Matod ni Sr. Insp. Edwin Lacostales, information officer sa CIDG-7, nga duha ngadto sa tulo ka mga semana nilang gipanid-an si Punay.

Sa dihang nakompirmar nga magdala kini kanunay og armas, ni-apply na sila sa korte sa search warrant.

“May reklamo sa kanya na magdala sya ng baril kaya pina surveillance natin at na confirm na may armas talaga sya,” matod ni Lacostales.

Nakuha sa iyang posisyon ang usa ka KG9 sub machine pistol, 9mm pistol ug usa usab ka kalibre .45 nga pistola uban sa daghang mga bala.

Gihimakak ni Punay nga iyaha ang tanang armas sanglit ang giangkon lang niya ang kalibre 9mm nga pistola nga dunay mission order gikan sa military.

Nagtiner siya og armas tungod sa iyang kaaktibo sa batok sa illegal drugs nga iyang gituohang nagpaluyo.

/ ALAN TANGCAWWAN

Newspapers in Tagalog

Newspapers from Philippines

© PressReader. All rights reserved.