Hunta Probinsiya mireklamo sa DPWH

SuperBalita Cebu - - BALITA - ASTRA ZINA D. LOGARTA / Correspondent

Giulan og mga reklamo ang Department of Public Works and Highway (DPWH) atol sa regular nga sesyon sa Hunta Probinsiyal.

Kini nunot sa kakuwang og mga early warning device sa ilang gihimo nga road widening project sa brgy. Pitalo, lungsod sa San Fernando sa habagatang Sugbo ug bisan sa ubang dapit sa probinsiya.

Nag-abot atubangan sa mga sakop sa Hunta Probinsiyal ang pipila ka mga opisyal sa brgy. Pitalo, ug ang mga tinugyanan sa DPWH 2nd Engineering District.

Pareho silang gipatawag pinaagi sa reolsuyon ni 1st district provincial board member, Raul Bacaltos, nunot sa nagpadayon nga road widening project sa Pitalo, nga giingong nakamugna ug daghang aksidente sa maong dapit.

Ang barangay secretary sa Pitalo nga si Rolando Frias, nagkanayon nga sukad pa sa miaging tuig, daghan na sila’g natala nga mga aksidente mugna sa wa’y klarong warning device sa nagpadayon nga pagpalapad sa dalan sa ilang dapit, ilabi na panahon sa kagabhion.

Dugang niya, dunay higayon nga nagpasad lang ang mga kabilya nga gigamit sa proyekto, nga iyangt gihulagway nga risgo usab alang sa mga maglakaw lang nga mga residente. Alang sa barangay, tulubagon sa DPWH ang mga kakuwangan sa safety measures sa ilang kontraktor.

Gipaniguro hinuon sa labaw sa DPWH 2nd Engineering District, Engr. Leslie Anthony Molina, nga ma-address dayon ang maong mga reklamo pinaagi usab sa pagpakig-alayon sa kontraktor nga mao ang AR Adlawan Construction.

Apan gihimug-atan niya nga base sa ilang record, wa nay natala nga aksidente karong tuiga, mugna sa ilang proyekto sa San Fernando.

Iyang giawhag ang mga motorista nga dili lang usab ibasol tanan sa ilang ahensiya ang mga disgrasya ug kinahanglang magmainampingon kadtong mga magmaneho ug mga sakyanan ug motorsiklo nga moagi sa widening site.

Apan dili lamang diay sa Pitalo na-obserbahan ang mga lapso labot sa kakuwang sa warning ug safety device sa DPWH projects. Nakabantay usab niini ang mga board members gikan sa ubang mga distrito.

Gani si Bise Gob. Agnes Magpale, nihulagway sa DPWH nga kuwang og monitoring sa ilang mga kontraktor, ilabi na nga lakip man diay sa kontrata ang pagsiguro nga dunay igong early warning ug safety device ang ilang mga proyekto.

Subay niini, ang chairman sa committee on public safety sa Hunta Probinsiyal, Bokal Sun Shimura, niduso og incidental motion pag-awhag sa tanang engineering district sa DPWH lukop lalawigan pagbutang gyud sa gikinahanglan nga mga butang sama sa blinkers ug reflectorized stickers sa tanan nilang proyekto, aron paglikay sa mga disgrasya, ilabi na panahon sa kagabion. /

Newspapers in Tagalog

Newspapers from Philippines

© PressReader. All rights reserved.