Unang TV

SuperBalita Cebu - - SUPER BIRADA - Insoy Niñal

Sa akong media literacy class gahapon, naghisgot mi sa kasaysayan sa TV. Ug namalik tanan nakong kasinatian kalabot niini sa bata pa ko. Samtang nag-istorya ko atubangan sa akong mga estudyante, sige kog panghupaw ug usahay daw may luha nga manglugmaw.

Naklaro tingali sa mga akong mga estudyante nga gimingaw ko sa panahon nga yano pa ang pagpuyo ug simpol pa ang kinabuhi.

“Mao pud nay ingon sa akong parents, sir,” ingon ang usa ka estudyante. Misamot katiguwang akong pamati. Ahak ning bayhana ay, hagbongon bi.

Sa among sitio kaniadto dili tanan adunay TV. Tingali sa matag napulo ka panimalay, maayo nag naay usa. Usa mi sa mga walay TV. Sa silingan ko magabhian og tan-aw’g Sesame Street.

Morag community event ang motan-aw’g TV kaniadto. Kon ikaw ray adunay TV sa barangay, di ka maglinaog, ipaambit nimo ang kalipay sa uban. Magdasok ang mga tawo sa usa ka balay kon away na ni Muhammad Ali.

Kausa, schedule to nga isalida ang pelikula ni Ramon Zamora, akong hero nga karatista nga gitawag og Bruce Lee of the Philippines. Nagtapok na ming mga bata sa balay sa among silingan nga adunay TV. Apan naunsa ba nga di man mo-on ang TV. Nahutdan diay’g battery.

Nanagan mi sa pikas silingan nga may TV sab. Apan di mi kasulod kay nanira ang mga kanahan. Di magpatan-aw.

Nanagan mi padung sa merkado kay tuay tindahan didto nga adunay TV. Apan di mi patan-awon sa tindera kon wa mi paliton. Nanagan na pud mi pauli sa balay aron magkuhag kwarta.

Apan di na ko hatagan ni mama og kwarta kay gitagaan na ko niya og pang- snacks pagkabuntag. “Unsay lutoon nimo para panihapon, ma? Mopalit lang ko daan og lamas ron,” ako siyang giingnan. Ug gihatagan ko ni mama og pampalit og mantika kay magprito siyag isda.

Gipaningot kog dinagan pabalik sa tindahan kay syur ko nagsugod na ang salida. Apan sa akong pag-abot, hapit wa nay tindahan nga makita tungod sa kadaghan sa tawo.

“Ayoooo, palit kog mantika, palit kog mantikaaaaaa,” nagsyagit ko sa gawas. Apan kinsay makadungog nako? Labihang kusoga na sa syagit sa mga tawo, “Kana! Kulataha na, piangi!” Mipauli ko sa balay. “Asang mantika?” nangutana si mama. “Wa pa ko kapalit ma,” mitubag ko, hinay ang tingog.

Gitan-aw ko ni mama, gihapuhap akong ulo, dayon milingkod tapad nako.

“Para nimo, dong, angayan kaha diha nato ibutang ang TV?” iya kong gipangutana, gitudlo ang usa ka lugar dapit sa sala ug dayong pahiyom nako.

Mibudlat akong mata sa akong nadungog. Wa koy laing nasulti kon di, “Yeheyyyy!” dayong dagan padung gawas aron mopalit og mantika.

Newspapers in Tagalog

Newspapers from Philippines

© PressReader. All rights reserved.