USJ-R MOSUWAY SA WEBMASTERS
Mga duwa karon 1:00 pm- DBTC batok USJR ( jrs) 2:30 pm- USC batok UV ( jrs) 4:00 pm- CEC batok UC ( jrs) 5:40 pm- UC batok USJR (srs)
Mosuway pagkuha og bahin sa liderato ang University of San Jose Recoletos (USJR) Jaguars sa ilang pagpakigbatok sa University of Cebu (UC) Webmasters sa main game karong hapon sa Cebu Schools Athletic Foundation Inc. (CESAFI) basketball college division sa Cebu Coliseum.
Ang kadaugan sa Jaguars maoy makatukmod kanila sa ibabaw nga bahin diin ilang ikauban ang defending champion University of the Visayas (UV) Green Lancers ug University of San Carlos (USC) Warriors.
Ang Jaguars adunay 4-1 nga rekord samtang ang Green Lancers ug Warriors parehong naghupot og 5-1 nga baraha.
Sa ilang bahin, ang Webmasters nagsunod sa Jaguars nga adunay 3-2 nga rekord.
Ning puntoha, wala pa’y nakaseguro og luna sa semi-finals hilabi na sa top two spots nga adunay pakapin nga
twice-to-beat nga bintaha. Ang Webmasters ug Jaguars nahilakip sa teams nga adunay poruhan nga makapuwesto sa top two hinungdan nga importante kaayo nila ang paghakot og dugang kadaugan.
Ang duha ka mga kampo pulos tag-as og moral hinungdan nga gilauman ang kulbahinam nga kombati sa ilang panagtagbo.
Ang Jaguars ni coach Jun Noel gikan sa impresibong kadaugan batok sa Warriors, 61-58, samtang ang Webmasters ni coach Raul “Yayoy” Alcoseba gikan sa duha ka sunodsunod nga kadaugan batok sa Cebu Institute of Technology University (CITU) Widlcats, 75-57, ug University of Southern Philippines Foundation (USPF) Panthers, 107-95.
Sa high school division, magsangka sa premirong duwa ang DBTC Greywolves (2-4) batok USJR Baby Jaguars (3-2) unya mosunod ang engkuwentro sa USC Baby Warriors (3-2)batok UV Green Lancers (5-0) ug Cebu Eastern College (CEC) Dragons (2-2) batok UC Baby Webmasters (3-2).
Sa laing bahin, gipakuratan sa USPF Panthers ang SWU Cobras, 80-71, sa college division niadtong Huwebes samtang gipangpukan sa DBTC Greywolves ang USPF Baby Panthers, 86-77, sa high school division.