5-ANYOS NAHULOG, NALUMOS SA ATABAY

Patay ang usa ka 5-anyos nga batang babaye human kini malumos sa usa ka atabay sa Barangay Dayhagon, lungsod sa Medellin, amihanang Sugbo niadtong Sabado sa buntag.

Ang biktima mao si Joan Dumuram Rivera.

Sa wala pa madiskubrihi nga nalumos ang bata, nikuyog pa kini sa iyang inahan nga si Erlinda nga nanglabada alang sa ilang silingan nga si Nida Yuson.

Pasado alas 8:00 sa buntag, dihang nangita na si Erlinda sa iyang anak aron unta mamahaw sa panimalay sa pamilyang Yuson.

Nangayo na og pakitabang ang inahan sa iyang mga silingan aron makit-an ang bata, diin uban niini nangita sa sapa apan wala kini didto.

Ang ig-agaw ni Joan nga si Alfe Arcillas niadto sa atabay diin didto nanglaba si Erlinda.

Ug didto niya nabantayan nga ang tabon sa atabay wala matarong og sira o kang-a na kini.

Nagkuha si Alfe og kahoy ug iyang gibutang sa tubig sa atabay ug didto na nila nadiskubrihan ang lawas ni Joan.

Ang inahan wala makabantay nga nahug na diay ang iyang anak sa atabay.

Si Joan dali nga gidala sa Cebu Provincial Hospital sa dakbayan sa Bogo apan, gideklarar kini sa doktor nga patay na.