BATA, 2, KULATADO SA AMA-AMA
SUSPEK SABOG SA ILLEGAL DRUGS, NASIKOP; MAMA MIESKAPO
■ ARMADO. Duha ka armadong mga lalake nasikop ug nakuhaan og armas sa kapulisan nga nagpatrolya sa kabukiran sa Brgy. Bonbon, dakbayan sa Sugbo. Ang mga suspek giila nga mao sila si Adrian Cabriana (tuo), 33, gilambigit sa drugas sa bukirang barangay sa siyudad ug Etlio Cañeda (wala), 23. Ang duha nakuhaan og kalibre .45 nga pistola, .38 kalibreng revolver ug mga bala (sukip nga hulagway).
Nanghuboy ang nawong sa dos anyos nga lalake human siya gihimong ‘punching bag’ sa iyang ama-ama nga usa ka drug surrenderer sa Barangay Mactan, LapuLapu City.
Mga silingan naluoy sa bata, mao nay mi- rescue sa biktima sa dihang gisumbag, giparok ang ulo ug wa pa makontento, gibali-bali og sagpa sa ama-ama sa dihang nagminatay og hilak ang bata kagahapon sa udto.
Ang suspek gi-ila sa kapulisan nga si Jovie Alburo Alegria, 24, taga-Sityo Ka Isko, Mactan, katabang sa pagpaninda og sud-an sa kan-anan nga gipanag-iya sa iyang inahan.
Naglingo-lingo og pamalibad si Alegria sa pasangil apan base sa kuha nga video sa cellphone sa usa sa mga silingan, lig-on ang ebidensiya nga nagpakita nga iyang gidagmalan ang bata.
Dili kini maoy unang higayon nga gihimo kini ni Alegria sa iyang humagbos.
Sigun sa asoy sa mga silingan nga sa higayon nga makatama kini og drugas, ang bata maoy iyang tripingan.
Usa nga mga saksi nga nagdumili sa pagpa-ila nipasangil sab sa 21 anyos nga inahan sa biktima nga tiggamitan sab og shabu nga way kaluoy nga mobunal-bunal sab sa iyang anak. Sa dihang nagsingabot ang
responding team sa kapulisan sa biktima, dali nga nilayas ang inahan bitbit sa iyang wa pay tuig nga anak babaye nila ni Alegria.
Atol niining pagsuwatubos gipasa medical check-up ang bata diin makita ang dakong bukol sa iyang agtang.
Siya i- turn ngadto sa City Social Welfare and Services nga mao na unyay mo-atiman kaniya.
Si Alegria mag-atubang og kaso nga kalapasan sa R.A. 7610 kun “Special Protection Against Child Abuse, Exploitation and Discrimination.”/