Pagpagaan

Naghisgot ko sa miaging Dominggo kabahin sa akong pag limit sa karne ug kan-ong humay. Sukad ko nagsugod mga tulo ka semana ang nakalabay, akong pamati nigaan ang akong lawas. Bitaw, nius-us ko og labing minos six pounds. Wa pa ko maka exercise gani o bisan gamay lang nga pasingot, nigaan na ko. Akong gitamod ang one cup of rice kada kaon ug sagad isda ug utan lang ang akong gikaon.

Ang akong blood pressure naa ra sab sa 120/90 nga di ikahibung kuno sa akong edad. Kon mag-exercise ko og sige, dali ra ning mokanaug ngadto sa 120/80 o 110/70. Base ni sa akong kasinatian.

Usa usab sa akong nabantayan nga makapasaka sa akong blood pressure mao ang pagsige og inom og kape. Kon minusan nakog maayo ang akong kape, bisan way exercise, 120/90 gihapon ni. Mao na ang advantage kon way bisyo sama sa inom, sigarilyo ug uban pa.

Moinom man tuod ko pero sa mga okasyon lang. Di pa sa tanang mga okasyon ko moinom labina gipahimangnoan ko sa doctor sa di maayong resulta tungod sa akong alcohol allergy.

Mobalik

Sa ako nang giingon, ang akong pag limit sa kaon akong gitumong sa pagpangandam nako sa pagbalik sa mountain biking. Bentaha kon mas gaan ang lawas sa pagtindak kay medyo makuhaan ang kalisod sa pagtungas.

Wa pa ko makakita og tawo nga tambok nga mosutoy sa pagtungas samtang nagsikad. Nakakita ka na ba og professional cyclist nga tambok? Tan awa ra gud nang mangapil og mga lumba sa road bike, yagpis og mga lawas. Duna sab na silay gi-maintain nga timbang hinungdan nga duna silay diet program nga giandam sa ilang nutritionist.

Hopefully, sa akong gihimo, di na ko maglisod og maayo sa tungas, labina nga prone ko sa bikog.

Nagkadaghan

Nalipay lang ko nga kada adlaw makakita ko og mountain bikers magtungas padung sa Pit-os ug sa Busay. Naa say daghang nag-jogging bisan sayo pa sa buntag.

Duna ra bay mga pagtuon nga mas maayo ang mag exercise sa buntag. Pinaagi sa sayo nga exercise, ang imong mode sa tibuok adlaw maayo. Mo boost usab ni sa enerhiya. Busa, ang exercise sa buntag maayo kay sa gabii.

Kon sayo sa buntag, gikinahanglan ang pagsakripisyo. Kalisod baya ibangon kon ang unlan ug katre mogakos nimo. Kalbaryo ang pagbangon og sayo.