Tag-iya nangunay og spray sa iyang balay

Tag-iya sa balay pa-abangan sa Sityo Paradise, barangay Pajo dakbayan sa Lapu-Lapu nangunay og spray sa iyang struktura nga adunay marka: “Balay puloy-anan dili suyopanan. By: The Management”.

Tuyo ni Rolando Godinez nga ma-undang na pagdagsa sa mga wa mailhing tawo nga mosaka sa usa sa iyang mga unit nga iyang gituohang manuyop og shabu.

Gipa-abot ni Godinez, usa ka PUJ driver, ang iyang kabalaka ngadto ni Pajo barangay kapitan Junard Chan nga aduna nag-abang kaniya nga giingong migamit sa unit isip suyopanan.

“Mo- drive (PUJ) man ko gud, inig lakaw nako manaka (laing tawo) man pud,” tipik sa pamahayag sa maong tag-iya.

Aron nga dili malambigit si Godinez sa maong binuhatan ug paagi sab sa iyang pagbadlong hinungdan nga iyang gi-pintalan ang bungbong sa ganghaan sa iyang pa-abangan nga adunay lima ka kuwarto diin ang usa niini mao sab ang iyang gipuy-an.

Ang maong pagpamintal nahitabo niadtong adlawa Sabado ug nakita ang dakong kausaban kay nahunong ang pagsud-gawas sa mga tawo nga bisita sa maong nag-abang.

Si Chan sa iyang bahin miawhag sa uba niyang konstituwente nga nagmatngon sa iyang pahimangno sa katuyoan nga mamahimong drug-free barangay ang Pajo.

“Dili ni masulbad namo kon way tabang sa katilingban,” mensahe sa opisyal kinsa niadtong miaging adlaw mipaguba og usa ka balay sa Sityo Camansi nga gikatahong gihimong drug den sa notadong

drug personality nga milayas na sa maong dapit.

Isip kabahin sab sa iyang kampanya batok sa illegal

drugs namilit sab og stickers ang mga barangay personnel sa pipila ka mga balay nga pahimangno sa publiko sa pag-undang ilabi na niadtong nalambigit sa droga. /