BEER, GIN MAG-UNAY
Mag-unay ang magsuong
teams Brgy. Ginebra Gin Kings ug San Miguel Beermen sa main game karong gabii sa quarter-finals sa Philippine Basketball Association (PBA) Governor’s Cup conference sa Mall of Asia Arena sa Pasay City.
Ang Beermen maoy alkanse og sitwasyon ning maong panagsangka gumikan kay adunay twice-to-beat nga bintaha ang Gin Kings isip benipisyo sa mas taas nilang posisyon nga nakuha human sa eliminasyon.
Ang Gin Kings minghuman sa elimination round dala ang 8-3 nga rekord nga nagpahiluna kanila sa ikatulo samtang ang Beermen naa sa ikaunom bitbit ang 7-4 nga baraha.
Bisan sa bintaha sa Gin Kings, wala gibati og kahadlok si coach Leo Austria kansang Beermen nagtinguha og laing Grandslam title ning komperensiyaha. Ang Beermen unang nakadaog sa talagsaong Grandslam title niadto pang 1989.
Dili na bag-o alang sa Beermen ang pagsagubang og malisod nga tahas ug malaumon gihapon silang makakita sila og pamaagi aron mapukan ang defending champions ning ilang panagparang.
Kon nakabangon ang Beermen gikan sa 0-3 nga biya ug sagunsonan nga gipilde ang Alaska Aces sulod sa upat ka mga higayon niadtong 2016 All-Filipino finals, labing seguro kaya sab nilang buntogon ang Gin Kings sulod sa duha ka sunodsunod nga mga higayon.
“Twice-to-beat, nandito naman kami noon eh. Maraming beses na nangyari sa’min yan - 0-3 kami, nanalo pa rin kami. We’re down against Meralco before, tinalo pa rin namin sila. This time, we’ll try
again,” matod ni Austria sa inetrbyu sa Spin.ph.
“We need two wins to get into the semis. Yung inaasam namin na mag-champion this conference, nandoon pa rin naman eh.” Sa ilang panagharong sa elimination round niadtong Septiyembre 10, gipanghubog sa Beermen ang Gin Kings, 107-103.
Ang Gin Kings adunay kakulian nga sagubangon ning duwaa kay gituohang dili pa 100 percent ang kondisyon sa usa sa ilang mga sinaligan nga si Kevin Ferrer, kinsa adunay angol sa bukog sa aping niini. “May konting fracture lang, but OK naman siya,” asoy ni Ginebra executive Al Francis Chua. Hinuon giklaro ni Ginebra
coach Tim Cone, andam silang mokombati sa Beermen bisan dili makaduwa si Ferrer.
Wala pa’y katinuan kon paduwaon ba sa Gin Kings ang sakop sa Batang Gilas ning kombatiha. Sa laing parisan sa quartermagsangka ang Talk N’ Text KaTropa batok Rain or Shine Elasto Painters.
Isip No.2 team, ang KaTropa naghupot sab og twice-to-beat nga bintaha kontra sa No. 7 nga Elasto Painters.