Aspa-Cristwil mag-abot sa final sa Talisay Mayor's Cup

Mga duwa ugma: 6:30 pm. Kimlex vs. San Remigio (3rd place) 8:00 pm. Aspa vs. Cristwill (championship)

Gipahimuslan sa Aspa Formworks and Scaffoldings ang pagpalta ni PBA-bound Mark Jayven Tallo ug ilang gipakaging ang title-favorite San Remigio Properties, 7571, sa semifinals sa Talisay City Mayor’s Cup Open Invitational basketball tournament niadtong Miyerkules sa Talisay City Sports Complex.

Gawas kang Tallo, wala usab makaduwa sila si Randy Colonia ug Marvin Arong sa San Remegio Properties gumikan sa managlahing rason.

Tungod niini wa usiki sa Aspa ang panahon ug bisan pa man tuod sa hugot ug sikit nga panagsangka, ang Scaffoldings Specialists ni Arnold Quilaton nakakita og gamayng lungag sa naghinapos nga bahin nga maoy ilang gihimong lutsanan sa kadaugan.

Nagkumboya sila si Moniva, Enrico Llanto ug Frangel Omolon og 45 puntos aron pangulohan ang Aspa apan ang duha ka free throws ni Codilla maoy nagselyo sa kadaugan.

Diha pa untay kahigayonan nga modaog ang San Remigio sa himatyong mga segundos diin naglabaw og dos puntos lang ang Aspa apan ang duha ka sipyat ni Harold Cincoflores sa three-point area sa katapusang otso segundos maoy nagtiklop sa ilang paglaom.

Sa kadaugan, ikasangka sa Aspa ang Criswil ni coach Jurie Violango kinsa mipukan usab sa Kimlex, 108-100, sa main game.

Ang Cristwil nga gipanag-iya ni Engr. Wilson Villanueva misandig sa 26 puntos ni Joshua Dela Cerna ug ni kanhi Mapua Cardinals mainstay Shane Menina nga mitali usab og 19 puntos gawas sa iyang lima ka mga assists.

Nagpulipuli og sakmit sa labaw ang matag habig sulod sa unang duha ka mga quarters, apan sa sayong bahin sa fourth quarter misugod na sa pag-arangkada ang Cristwill.

Ang championship ipahigayon ugmang adlawa sa alas otso sa gabii human sa panagsangka usab tali sa San Remigio ug Kimlex alang sa third place honor. Mga puntos: Unang duwa:

Aspa (75) – Moniva 21, Llanto 12, Omolon 12, Codilla 7, Ceneza 5, Linao 4, Baribe 4, Cesa 4, Paspe 4. San Remigio (71) – Taboada 16, Lao 12, Cincoflores 12, Sumayang 11, Regalado 9, Aguirre 6. Ikaduhang duwa:

Cristwil (108) – Dela Cerna 26, Menina 19, Dimco 14, Cabanero 12, Valencia 10, Colegado 8, Panerio 7, Cantonao 7, Hernando 5. Kimlex (100) – Villaver 28, Delos Santos 13, Botohan 13, Navarro 10, Badillas 9, Delator 9, Zanoria 7, Gallarde 6, Avila 3.