ROS VS. TNT: TINAKTAKAY
Matira ang matibay.
Mao kini ang senaryo nga masaksihan karong gabii sa panagtakos og balik sa Rain or Shine Elasto Painters ug sa TNT Ka Tropa sa nagkainit nga PBA Governor’s Cup quarterfinals duel sa Mall of Asia Arena.
Kini human nga niadtong Miyerkules, gibuntog sa Elasto Painters ang Ka Tropa, 106102, nga maoy nakapapugos ug nakainat sa ilang panag-ilog og luna alang sa semifinals round.
Ang TNT, human sa elimination round, nahimutang sa ikaduhang luna sa overall standing (8-3) ug maoy nakaangkon sa twice-to-beat nga bintaha, apan ang ilang pagkapukan niadtong Miyerkules sa mga kamot sa no. 7 mga Elasto Painters (7-4) maoy nagwagtang sa ilang pabor.
Ang import nga si J’Nathan Bullock nga giabagan usab ni Gabe Norwood ang nasandigan ni coach Caloy Garcia aron ilang mabuntog ang Ka Tropa sa ikaduhang higayon ning maong conference.
“We just extended the series,” mao ray mapaubsanon nga paghulagway ni Garcia human sa ilang kadaugan. “We just have to prepare again for Friday’s game.”
“I told the players from the very beginning that we have a good matchup against TNT, with their import, their locals. Same things we run, same system. So it would all be about who wants it more on the defensive side.”
Ang pagpulipuli og hugot nga depensa sa import sa TNT nga si Glenn Rice Jr. ang nakatampo og dako sa kadaugan sa Elasto Painters. Si Rice nalimitahan lang ngadto sa 19 punto S bisan tuod og nakalangkat kini og 10 ka rebounds.
Sa panaghugpong nila ni Troy Rosario, Kelly Williams ug Jayson Castro, ang TNT mihinay-hinay og paduol sa Rain or Shine human kini mabiyai og 20 puntos ngadto sa 102-105, 30 segundos ang nahabilin sa duwa.
Ang pagpasulod ni Norwood sa usa sa iyang duha ka free throws, ug ang pagkasipyat ni Rice sa iyang three-point shot maoy nagpinalisar sa resulta.
Ang modaog karong gabii maoy makigsangka sa nagpaabot nga Barangay Ginebra sa semifinals round.
Nakapugnit og lingkuranan sa semifinals round ang Ginebra human nila dabo-dabohi ang San Miguel Beer, 104-84, niadtong Miyerkules sa gabii. /