Niadto nailang lab-asera, karon notadong tigbaligya og drugas nasikop

Giingong manindahay og isda kaniadto shabu na karon apan, walay suwerte kay nasikop sa kapulisan sa dakbayan sa Talisay.

Ang suspek nihimakak sa iyang kalambigitan sa ilegal nga drugas.

Ang buy-bust operation nahitabo sa Sitio Tunga, Barangay Tanke, dakbayan sa Talisay niadtong nakalabayng adlaw sa alas 4:30 sa hapon.

Sigun sa taho ang nasikop mao si Jeseta Surigao alyas Gin-Gin, 57, minyo ug nagpuyo sa maong dapit.

Si PO2 Stephen Sefuesca niingon nga street level pusher ang suspek sa lugar.

Matod pa, nga manindahay kinig isda apan giingong nibalhin na sa pagpamaligyag ilegal nga drugas.

Ang iyang porma mao pa man ang porma sa namaligya og isda nga sayal ug adunay dakong bulsa sa atubangan niini.

Human madawat sa kapulisan ang ilegal nga kalihukan sa suspek dali silang naniid sa kalihukan ug sa dihang positibo gihimo gilayon ang buy-bust operation.

Nakuhaan ang suspek og 12 ka gagmay nga pakite nga gituohang shabu.

Apan ang suspek nihimakak nga nalambigit siya pagpamaligyag ilegal nga drugas.

Matod niya nga didto siya sa lugar aron mag-atang sa nakautang kaniya og habol samtang ang mga pulis adunay nasikop sa unahan nga bahin.

Apan nahibulong na lang siya nga gidala sa mga pulis ang dinakpan ug siya na ang gitudlo nga gipalitan ug gidakop sa kapulisan.

Iyang gibutyag nga ang dinakpan sa pulis maoy gibuhian ug ang mga nakuha sa ilang unang nasikop maoy gihimong ebidensiya batok kaniya.

Samtang, ang dinakpan mao na hinuoy gibuhian sa mga pulis.

Bisan pa sa iyang katarungan, gitanggong gihapon ang suspek ug gikatakda nga pasakaan og tukmang kaso sa korte.