Barbero gitiunan kay langay manupi

Gihukman nga mabilanggo sud sa unom ka buwan ang usa ka inahan nga gipasanginlan nga naniun og armas sa usa ka barbero nga nagtupi sa buhok sa iyang anak.

Si Andrea Smith niangkon nga sad-an sa pagdaladala og armas nga way lisensiya ug nagbutang sa peligro sa kinabuhi sa iyang mga anak.

Ang pagpaniun nahitabo sud sa usa ka barberohan sa Cleveland, USA niadtong Abril.

Sa taho sa ABC News, nasayran nga nasuko si Smith kay dugay nahuman og tupi ang barbero sa iyang 7-anyos nga anak nga lalake.

Asoy sa mga pulis kini ang hinungdan nga nibunot ang ginang sa iyang armas ug giingong nition niini ngadto sa barbero.

Gihipos ra hinuon ni Smith ang armas dihang gipakalma kini sa laing empleyado sa barber shop.

Human matupihi ang anak, si Smith yano nga nibiya kauban ang iyang mga anak. Way naangol sa hitabo. Sa pag-atubang sa 31-anyos nga inahan sa korte, siya nangayo og pasaylo.

Si Smith niangkon nga nagdala og armas nga way lisensiya.

Apan iyang gihimakak ang pasangil sa mga pulis nga iyang gihulga ug gitiunan og armas ang barbero. /