42 ANYOS NAG-DEBUT
Ang ubang mga dalaga nangandoy makasuway mag debut party sa ilang ika 18 nga birthday.
Sama ni Jane Jumao-as, sa dihang nag-edad og 18 wa makasuway mag debut party.
Apan ang maong pangandoy naabot sa panahon nga wa niini damha nga gituman sa iyang kapikas sa kinabuhi nga si Bonifacio “Boni” Cabras, 65.
Atol sa ika 42 nga kasumaran sa iyang adlaw nga natawhan niadtong Septiyembre 2, 2017, si Jane nahisama sa usa ka debutante gumikan sa gisurprisa nga debut party ni Boni alang niya.
Si Boni nakigkonsabo sa pamilya ni Jane ug sa mga higala niini labi na sa best friend nga si Grace Sia.
Aron dili mahalata, si Jane giingnan ni Grace nga magpamakeover silang duha kay mangadto sila og diskohan ug kinahanglan nga magsul-ob sila og gown.
Tuod, nagpa- facial sila, nagpamasahe, nagpa- scrub ug nagpa- makeup sa usa ka spa ug saloon sa Crown Regency Hotel and Towers sa Fuente Osmeña, siyudad sa Sugbo.
Pagkanaog nila sa ikalimang andana, niabli ang pultahan sa function room, ngitngit ang sulod ug sa dihang nisulod na si Jane sa lawak, nakatutok ang spotlight ngadto niya.
Niduol si Boni niya ug nitunol sa mga buwak.
Samtang sila naglakaw paingon sa stage, dunay nikanta og “Journey,” ang awit nga gipasikat ni Leah Salonga.
“Nangurog jud ko paglakaw gikan sa door paingon sa stage,” asoy ni Jane sa Superbalita Cebu.
Si Boni nikanta kang Jane, og “My Love Will See You Through,” nga gipasikat ni Marco Sison.
Si Jane wa makapugong sa iyang mga luha sa surprisa nga iyang natagamtaman apil na ang paghatag og video message sa ilang anak nga lalake nga si Ralph Dave, 19, nga tua magtungha sa Australia.
Diha sa birthday party ang iyang anak nga babaye nga si Vanessa Jane, 21, ang mga miyembro sa iyang pamilya ug mga batch mate sa high school nga gikan pa sa lungsod sa Tabogon ug ang mga empleyado sa ilang kompaniya.
Ug mas nahugyaw ang tanan dihang gianunsiyo ni Boni nga “Wedding will follow soon.” Ang duha busy karon sa pagpangandam sa ilang umaabot nga kasal karong Enero sa sunod tuig human sa 25 ka tuig nila nga panag-ipon.