Horn gusto gihapong moaway’g balik ni Pacqiuao
Simple ra ang plano sa trainer ni Australian fighter Jeff Horn: Segurohon nga aktibo sa kanunay ang iyang batos hangtod mahan-ay ang rematch niini kang Filipino boxing icon Manny Pacquiao. Unang tahas ni Horn alang ning maong plano mao ang pagdepensa sa iyang World Boxing Organization (WBO) welterweight title batok kang British Gary “Hellraiser” Corcoran, posible karong Disyembre 15 sa Brisbane, Australia. Si Corcoran, kinsa adunay rekord nga 26-1, maoy WBO’s Intercontinental welterweight champion. “(Corcoran) comes to fight, he’s a tough boy,” batbat ni Rushton sa interbyu sa www.boxingscene.com. Kon modaog si Horn batok kang Corcoran, hayan magpadayon ang iyang tinguha nga makig-away og balik ni Pacquiao aron ipamatuod nga dili taphaw ang iyang unanimous decision nga kadaugan batok ni Pacquiao niadtong Hulyo 2 sa Brisbane. Gumikan sa mga obligasyon ni Pacquiao isip senador sa Pilipinas, wala nahan-ay ang rematch nila ni Horn karong tuiga.