LAPU ANDAM SA FLUVIAL PROCESSION

Hingpit na ang pagpangandam sa dakbayan sa LapuLapu sa fluvial procession sa Birhen sa Regla ugmang adlawa.

Matod ni Tourism Officer Hembler Mendoza nga di mominos sa 25 ka mga bangka ug sakayang pandagat ang nagparehistro na sa iyang buhatan aron mosalmot sa maong kalihukan subay sa pagsaulog sa pista sa dakbayan.

Ugmang adlawa magsugod ang unang novena mass sa Birhen sa Regla subay sa kapistahan sa dakbayan sunod semana.

Si Mendoza nagkanayon nga sa Pacific Cebu Resort sa Suba-basbas magsugod ang fluvial procession mga alas 7 sa buntag ug motapos sa Muelle Osmeña mga alas 9 sa buntag.

Inig abot niini sa Muelle Osmeña, motabang og alsa paingon sa simbahan si Mayor Paz Radaza.

Dugang ni Mendoza nga atol sa kalihukan, moabag ug mo suporta sa Dakbayan ang Philippine Coast Guard, PCG Auxilliary, Philippine Air Force, Philippine Navy, Emergency Rescue Unit Foundation (Eruf ), Red Cross, kapulisan, mga pump boat ug jetski operators sa dakbayan ug uban pa.

Sa di pa ang prosesyon, usa ka misa ang pagahimuon una sa Marigondon Parish Chruch mga alas 5:30 sa buntag.

Sumala pa ni Mendoza nga sa prosesyon, katulo moyabo mga buwak ang PAF sa may sa Marcelo Fernan Bridge ug Muelle Osmeña.

Aduna say nagpaabot nga ganti ang mga pump boat sa mga barangay ug corporate office nga adunay maanindot nga dekorasyon.

Duha ka mga mananaog gikan sa barangay ug corporate offices category ang makadawat sa P7,000 alang sa first place most decorated and symbolic pump-boat, P5,000 sa second ug P3,000 sa third.