Kapitolyo mopasiugda og bugno sa pagluto

Mga lungsod sa probinsiya sa Sugbo ang magtigi kinsay labing hanas moluto karong Nobiyembre 16 hangtod 19, 2017 sa Kapitolyo sa Sugbo atol sa “Eats Meets West”— usa ka kalihokan nga ipahigayon ilawom sa pagdumala sa Provincial Tourism Office.

Buksan ang upat ka adlaw nga kalihokan inig Nobiyembre 16 sa lungsod sa Tuburan, nga mopakita sa ilang kape.

Gikatakdang motambong sa pagbukas sila si Gobernador Hilario Davide III ug Bise Gobernador Agnes Magpale.

Sa sunod adlaw, Nobiyembre 17, usa ka food forum ang ipahigayon tibuok adlaw sa Capitol Social Hall, diin pito ka mga batid moistorya kabahin sa karaang pagkaon sa mga Sugbuanon, unsa ang Sugbuanong linutoan, organic

farming, ug uban pa. Ang mga mamumulong mao sila si Dr. Ame Garong sa National Museum, Mike “Chef Tatung” Sarthou, Teresa Ruelas, Eleonor Rivera, Vince Cinches, Cristino Villamor, ug taga-Manila nga si Ige Ramos. Ang forum bukas sa publiko.

Buksan sab sa samang adlaw, Nobiyembre 17, ang Food Festival, diin gidapit ang publiko sa pagbisita sa lainlaing stalls dapit likod sa main

building sa Kapitolyo aron mopalit sa lainlaing matang sa mga pagkaon nga dalit sa mga lungsod sa Sugbo. Alas otso sa buntag hangtod alas otso sa gabii nga “Food Festival’ molungtad hangtod sa Nobiyembre 19, o ang katapusang adlaw sa kalihokan.

Mahitabo ang bangga sa luto sa Nobiyembre 18 hangtod 19, diin ang mga lungsod magtigi kinsay labing maayo mohimo og appetizer, welcome drink, dessert, main course, welcome lei, table set-up, ug packaging. Mag-ilog sab ang mga lungsod kon kinsa ang labing maayo mobuhi og balik sa luto nga ana sa 1923 nga cookbook ni Maria “Señora Inday” Fadullon Rallos. Ang Eats Meets West nagsukad sa komunidad sa ecotourism niadtong 2015.