UV kampiyon sa Vivo PCCL 3-on-3 Visayas leg
Nasugakod sa UV Green Lancers ang tanang pagpanghudlat sa USJ-R Jaguars aron angkunon ang korona pinaagi sa 47-43 nga kadaugan sa finals sa Vivo 2017 Philippine Collegiate Champions League (PCCL) 3×3 Visayas leg niadtong Sabado sa University of San Carlos gym.
Ang Green Lancers, nga gilangkuban nila ni Jan Monic Soliva, three-pointer Josue Segumpan ug Rey Anthony Suerte, miduwa sa sulod ug gawas aron lupigon ang Jaguars, basi sa taho sa www.foxsports.ph.
Sa kadaugan, nakaangkon ang kumbinasyon gikan sa Cebu Schools Athletic Foundation Inc. (CESAF) champions og luna alang sa National Grand Finals nga gikatakda karong Pebrero sa sunod tuig sa Manila.
Ang Visayas leg, nga gikombatihan og teams sa Cebu City, Bohol, Roxas City ug Dumaguete City, maoy unang tipik sa regional eliminations sa kompetisyon. Ang Green Lancers makiguban sa mga mogawas nga kampiyon sa regional games sa North/Central Luzon, South Luzon/Bicol, Mindanao ug National Capital Region.
Ang kompetisyon, nga ningkuha sa Fox Sports isip official broadcast partner, mopadayon karong Nobiyembre 18 sa Naga City alang sa South Luzon/Bicol regionals. Mosunod niini ang Mindanao
regionals sa Nobiyembre 25, North/Central Luzon karong Nobiyembre 30 ug NCR Regionals sa Disyembre 8.