23-ANYOS GIKIHA OG PAGPANAGIT

SuperBalita Cebu - - PORTADA -

Ulitawo gidakop ug gipriso human gipasanginlang nidagit sa 17 anyos niyang uyab sa miaging gabii sa Brgy.Pook, lungsod sa Sta. Fe, Isla sa Bantayan.

Kasong abduction ang atubangon ni Jhun Darwin Limotin, 23, nagpuyo sa nahisgutang lugar, human nireklamo sa kapulisan ang inahan sa dalaga nga ila rang silingan.

Si PO2 Roniel Umawan, desk officer sa Sta.Fe Police station nga nahinabi sa Superbalita Cebu, niingon nga ang inahan nga vendor maoy nangayog abag sa kapulisan human didto sa balay ni Limotin ang iyang anak.

Ang dalaga giingong nahubog human nag-inom ug si Limotin ug didto na makatulog sa balay sa lalake.

Tungod sa reklamo sa inahan, gipusasan si Limotin ug kasamtangang gitanggong samtang gihikay ang kasong abduction nga may kalambigitan sa Anti-Child Abuse Law.

Si Limotin nga nahinabi sa Superbalita Cebu hugtanong nanghimakak nga iyang gidagit ang iyang uyab.

“Siya ang miadto sa amo, nangusi nga dili siya mopauli kay masakpan unya siya sa iyang mama kay nakainom,” nagkanayon si Limotin.

Giingong nagkauyab ang duha niadtong Agusto.

Sabado sa gabii gihagad siya sa iyang uyab nga mag-inom ug nangahubog silang duha.

Newspapers in Tagalog

Newspapers from Philippines

© PressReader. All rights reserved.