MGA SAKOP SA LP MIBALHIN SA PDP

SuperBalita Cebu - - BALITA -

Dugang mga sakop sa Liberal Party (LP) sa lalawigan sa Sugbo ang mamalhin sa Partido Demokratiko Pilipino–Lakas ng Bayan (PDP-Laban).

“Halos tanang mayors sa province, gawas lang sa 5th district,” sumala sa mayor nga nihangyo nga dili nganlan sa Superbalita Cebu.

Si Gobernador Hilario Davide III nibutyag nga nipahibawo niya ang mga mayor sa ikaduha ug ikapito nga mga distrito sa Sugbo sa miaging semana sa ilang desisyon ug mga rason kon nganong manumpa sila sa partido ni Presidente Rodrigo Duterte.

Ang mass oath taking sa mga opisyal gikan sa taas hangtod sa barangay level sa kalungsuran ug dakbayan sa lalawigan mahitabo karong Nobiyembre 17 sa alas 2 sa hapon sa Plaza Independencia sa siyudad sa Sugbo.

Kini gipaabot pangulohan ni House Speaker Pantaleon Alvarez, Presidential Political Adviser Francis Tolentino ug ubang mga opisyal sa PDP-Laban.

Si Davide niingon nga ang buhatan ni Presidential Assistant for the Visayas Michael Dino ang nagpasiugda sa kalihokan diin gipatawag ang mga mayor.

Suma pa ni Davide ang mga mayor sa duha ka mga distrito nakigkita niya human sa pinirmahay sa memorandum of understanding tali sa kagamhanan sa lalawigan sa Sugbo ug Ramon Aboitiz Foundation Inc. (Rafi) alang sa paghimo og Integrated Development Project alang sa ikapitong distrito sa miaging semana.

Bisan kon masakop na sa PDP-Laban, matod ni Davide, nipasalig ang mga mayor nga mopaluyo gihapon niya sa iyang subli nga pagpapili pagka gobernador sa eleksyon sa 2019.

“I told them I will not hold it against you. Kita pud, di ta mamugos pud kay ako wa man pud ko pugsa pagsud sa LP (Liberal Party)... But they assured me however, that they would still support me in the event that I would seek reelection,” dugang ni Davide nga nisabot sa desisyon sa mga mayor kay alang kini sa kaayohan sa ilang mga konstituwente.

Bisan kon mamalhin na ang mga kanhi kaalyado sa pulitika, ang gobernador magpabilin nga sakop sa LP.

Siya gipasaligan usab sa lima ka mga kongresista, sila si Rep. Wilfredo Caminero, Peter John Calderon, Jonas Cortes, Joseph Felix Mari “Ace Durano” ug Gerald Anthony “Samsam” Gullas Jr. nga padayon mosuporta niya kon subli siya modagan pagka gobernador.

Nalantawan usab sa gobernador nga moapil usab sa PDP ang mga mayor sa ikaupat nga distrito sa umaabot samtang, sa ikalima nga distrito ang local party nga Barug Alang sa Kauswagan ug Demokrasya (Bakud) wa pay desisyon.

Newspapers in Tagalog

Newspapers from Philippines

© PressReader. All rights reserved.