CEBU DI NA MAAPIL SA PBA ALL-STAR?

SuperBalita Cebu - - SUPER SPORTS -

Nakadesisyon ang Philippine Basketball Association (PBA) nga ipahigayon na sab sa nagkalainlaing venues sa Luzon, Visayas, ug Mindanao ang All-Star activities niini alang sa 2017-18 season apan ning higayuna, posibleng dili mahilakip ang Cebu sa lugar nga pahigayunan.

Gumikan sa kalampusan sa miaging tuig diin nakigbatok ang Gilas Pilipinas sa tulo ka All-Star teams sa Lucena, Cebu ug Cadayan de Oro, ang PBA nakahukom nga mogamit gihapon sa samang sistema alang sa sunod nga season.

Ang Batangas maoy gikonsiderar nga pahigayunan alang sa Luzon samtang ang Davao alang sa Mindanao. Wala pa'y klaro kon asa ipahigayon ang kombati sa Visayas.

Sa miaging tuig, gigamit ang All-Star isip tipik sa preparasyon sa Gilas alang sa Southeast Asian Basketball Association (Seaba) ug FIBA Asia Cup.

Ning higayuna, wala pa'y kaseguroan nga moduwa ba gihapon ang Gilas sa All-Star ug kinahanglan pa kining tukion sa board.

Sa laing bahin, gikonsiderar sa PBA nga dungan nga mopahigayon og mga duwa sa Luzon, Visayas ug Mindanao alang sa opening sa 2017-18 season.

Gihimo na kini sa PBA niadtong 2013-14 diin adunay mga kombati nga gidungan sugdan sa Smart Araneta Coliseum sa Luzon, Cebu Coliseum sa Visayas, ug USEP gymnasium sa Davao sa Mindanao.

■ /SPIN.PH

ALL-STAR. Nakadesisyon ang PBA nga mogamit sa sistema sa miaging tuig diin mopahigayon kini og mga duwa All-Star sa Luzon, Visayas ug Mindanao apan posibleng dili na ang Cebu maoy pahigayunan alang sa kombati sa Visayas. Sa hulagway makita ang mga magduduwa sa PBA nga nagpasundayag atol sa miaging All-Star.

Newspapers in Tagalog

Newspapers from Philippines

© PressReader. All rights reserved.