Empoy nisakay sa float sa M. Lhuillier
Nindot ang panahon sa kapistahan sa Sinulog niadtong Dominggo kay dili init, walay uwan, walay dagkong hitabo as in malinawon ra gyud.
Usa sa mga artista nga akong nahimamat nianang pagkagabii sa bisperas sa Sinulog ang komedyanteng si Empoy Marquez nga mao karoy bag-ong endorser sa M. Lhuillier Kwarta Padala.
Excited kaayo siya kay una kuno niyang higayon nga mosakay og float sa Sinulog.
“Kahit na uminit, umulan, okay lang. Nagpapasalamat ako sa ibinigay na tiwala sa akin ng M. Lhuillier na maging official ambassador nila,” dason ni Empoy atol sa dinner namo didto sa Feria Restaurant sa Radisson Blu kauban ang opisyal sa M. Lhuillier nga si Ms. Malou Rocha ug Ms. Josie S. Pereyra.
“May ginagawa ako ngayong pelikula with Zanjoe Marudo, yung “Kusina Kings” at meron din akong upcoming teleserye sa ABS-CBN with Piolo Pascual, Arci Munoz at Alessandra de Rossi,” paambit sa 36-anyos nga aktor.
“3 STARS, 1 HEART” Gikan sa Radisson Blu, nitabok ko sa SM City Cebu mga alas 8:30 sa gabii nga mao say paghuman kuno sa fireworks competition nga gipahigayon sa parking lot, mao diay daghan kaayong tawo.
Pagkataudtaud nakadawat kog text message sa GMA nga, “kakastart lang po ng concert. Sana makahabol pa po kayo.”
Kay concert sad nianang gabhiona sa “3 Stars, 1 Heart” nilang Regine Velasquez, Julie Anne San Jose, ug Christian Bautista sa Waterfront Cebu City Hotel.
Pagtan-aw nako sa gawas, aguy puwerte man trapika, nagbaha ang mga pasahero. Wa na makaya sa akong powers.
DEADMA
Pag-abot diay nako sa Radisson Blu, giingnan ko sa akong amigong guard nga nakalakaw na ang mga artista sa ABS-CBN, tua na kuno sa Robinsons. Ako siyang giingnan nga dili man silay akong tuyo gud, si Empoy man.
Kining ABS-CBN gud mangimbitar lang ni kon mahulga na ang ilang supremacy, sama niadtong kalit nisaka ang popularidad ni Maine Mendoza, di ba kalit lang nangari sa Cebu ang tanang hosts sa Showtime. Karon, kusog man sila, deadma na.
Pun-an pa sa ilang bag-ong entertainment head karon sa Cebu nga walang ka-PR-PR! Samot!
EVA MIDAUG Gipahibawo ko sa Cebuana singer nga si Eva Santos nga nakadaug kuno sila sa Labor case batok sa Pinoycare Visa Center. Ilang nadawat ang desisyon gikan sa NLRC (National Labor Relations Commission).
Ako siyang giingnan nga “hope that all is well that ends well.” Ang iya rang tubag, “Amen.” /