Mas engrande nga Tostado Festival 2018 sa Santander
Mas engrande ug hugyaw ang pagsaulog sa mga molupyo ug lokal nga kagamhanan sa lungsod sa Santander sa Tostado Festival sa Abril 21 karong tuiga.
Si Santander Mayor Marilyn Wenceslao niingon nga ang 10 ka contingent barangays ang magtigi sa street dancing, dance showdown, best in costume, ug best in choreography.
Ang 10 ka mga barangay mao ang Poblacion, Bunlan, Cabutongan, Liptong, Pasil, Looc, Liloan, Canlumacad, Talisay ug Candamiang.
Ang street dancing magsugod sa alas 2 sa hapon nga manukad sa St. Gabriel Archangel Parish paingon sa Santander Central Elementary School diin himuon dance showdown sa mga contingent.
Ang matag contingent manayaw uban sa duyog sa tukar sa festival pinaagi sa tagsatagsa ka audio van.
Sa gabii, himuon ang indigay sa 10 ka mga kandidata sa Tostado Festival Queen diin ang premyo sa mga mananaug mao ang P10,000, P7,000 ug P5,000 alang sa una, ikaduha ug ikatulong mga dapit.
Ang Tostado Festival nagsugod niadtong Abril 2006 isip highlight sa mga kalihokan sa kapistahan sa lungsod, kinatumyang bahin sa habagatang Sugbo, pahinungod sa ilang patron, St. Gabriel Archangel.
Ang festival kinuha gikan sa pangan sa lamian ug inila nga produkto sa Santander, ang tostado kun cookies nga gama sa lokal nga mga molupyo sa lungsod gamit ang asukar, harina, mga itlog, baking soda ug shortening.
Ang lokal nga kagamhan sa Santander nagdapit sa tanan sa pagsaksi sa Tostado Festival 2018.