Bantayan milubong sa Sta. Fe sa opening day sa Gov’s Cup

Mipabaha og 33 puntos lakip ang upat ka triples, si Romeo Sumbi Jr. aron pangulohan ang Bantayan ngadto sa 83-58 nga kadaugan batok sa Sta. Fe sa opening game sa 2nd Governor’s Cup 2018 Governor’s Cup 2018 Basketball tournament kagabii sa Cebu Coliseum.

Gikan sa pagsugod sa duwa, klaro ug tataw kaayo ang dominasyon sa Bantayan nga gani nakaposti kini og 36-21 nga labaw sa pagsira sa first half.

Mibingat ngadto sa 18 puntos ang labaw sa third quarter ug wa na gyud molugak pa sa ilang paghupot sa labaw ang Bantayan.

Ang Bantayan ug Sta. Fe nahitabo sa Bracket 2 sa North Division uban sa Daanbantayan, Medellin, Madridejos ug San Remegio.

Ning pagsulat padayon pang nagduwa ang Boljoon ug Alcoy sa South Division.

Ang exhibition game tali sa mga mayor sa lungsod ug sa Kapitolyo maoy midayandayan sa mahulagwayng mabunggahon nga opening day.

Ang Mayor’s team nga mikuha og reinforcement nga si 1st District Congressman Samsam Gullas mipildi sa Board Members team, 66-61.

Ang parada sa tanang partisipante uban sa ilang mga tagsatagsa ka mga musa maoy mipatid kalihukan. Ang Boljoon team maoy midaog sa best in uniform, samtang ang muse sa Talisay City maoy midaog sa best muse.

Si Governor Hilario Davide III ug vice mayor Agnes Magpale uban sa pipila ka mga mayor sa lungsodang mitambong sa programa. Ang Governor’s Cup basketball ug volleyball tournament gipasiugdahan sa Cebu Province Sports Commission (CPSC) nga gipangulohan sa negusyanting si Michel Lhuillier ug ni sa executive director nga si Atty. Ramil Abing.