Nakalibog nga kaso

Naukay ang publiko kagahapon sa buntag bahin sa napusilan-patay sa awtoridad nga usa ka armadong lalake sa dili kasagarang sulod sa Archbishop’s Palace compound sa dan D. Jakosalem, dakbayan sa Sugbo. Sumala sa taho, ang maong lalake nisulod sa residensiya sa Arsobispo ug nangita kang Cebu Archbishop Jose Palma. Apan nigawas kini human nasayod gikan sa staff sa palasyo nga wala ang Arsobispo, dunay tigom sa Catholic Bishops Conference of the Philippines (CBCP) sa Manila.

Dugang sa taho nga nakamatikod ang staff sa palasyo nga armado kini hinungdan nga nanawag og pulis diin dali usab nakatubag sa alarma. Dihang niabot ang kapulisan gisita ang lalake apan giingong nibunot kini sa iyang armas busa giunhan sa awtoridad. Naantimano sa pagkaigo ug namatay dihadiha sa parking area sa compound sa Archbishop’s Palace. Uban sa kamatayon sa armadong lalake, giila sa iyang amahan nga si Jeffrey Cañedo, napakuyaw sa kadaghanan ug nimugna og daghang pangutana nga ang namatay lang mismo ang makatubag.

Dautan ba kaha ang iyang tuyo ni Palma? Sumala sa iyang amahan, problemado kini sukad sa nagbuwag kini sa iyang asawa busa dunay posibilidad nga magpatambag kini sa Arsobispo. Apan nganong nagdala og armas? Makutay ba kaha kini nga kaso sa ubang patay nga nahitabo? Apan maayong dili kita mag-una-una sa paghukom human nasuta usab nga managlahi ang motibo sa ubang kaso. Maghinayhinay kita sa pahukom nunot sa mga pangtahibo dinhi sa dakbayan ug tibuok nasod.

Si Cebu Auxiliary Bishop Dennis Villarojo, kinsa diha sa sulod sa palasyo atol sa hitabo, niawhag sa publiko nga mokalma lang taliwa sa kalibog sa motibo sa armadong lalake ug maglikay sa pagbanabana sa hitabo. Niawhag siya nga mag-ampo alang sa kalag sa namatay ug isangon g sa awtoridad ang pag-imbestigar sa kaso aron dili usab kita maoy tugkan sa kalibog. Kuyaw na.