PACQUIAO NADASIG TUNGOD NI DIGONG
Adunay igong rason si fighting senator Manny Pacquiao nga mas magmadasigon sa iyang umaabot nga dakong tahas -- personal nga mosaksi si Presidente Rodrigo “Digong” Duterte.
“Mas inspired ako,” matod ni Pacquiao sa interbyu sa Balitanghali nga programa sa GMA 7.
Ang Pambansang Kamao sa Pilipinas mosuway pag-ilog sa korona ni World Boxing Association (WBA) welterweight king Argentine Lucas Matthysse karong Dominggo sa Kuala Lumpur, Malaysia.
“Nais kong imbitahan lahat ng mga kababayan kong mga Pilipino na nandito sa Malaysia to watch the fight this coming Sunday,” matod ni Pacquiao sa iyang paghiabot sa Malaysia sa miaging gabii.
Kon wala mausab ang skedyul, si Duterte nakalarga na kagahapon paingon sa Malaysia aron mosaksi sa away ni Pacquiao ug aron makigtagbo kang Prime Minister Mahathir Mohamad.
Kagahapon sa buntag, sila si Pacquiao ug Matthysse gidalitan og colorful Malaysian welcome sa ilang pagsulod sa Le Meridien Hotel.
Mao kini ang labing unang kalihukan nga tambungan sa duha ka mga boksidor, pipila ka mga adlaw sa dili pa magkrus ang ilang dalan ibabaw sa ring.
Si Matthysse una og pipila ka mga adlaw ni Pacquiao sa pagabot sa Malaysia aron maanad kini daan sa klima sa nasod.
Giabibahan si Matthysse sa iyang pagpaso sa red carpet kagahapon diin nagpakuha kini og hulagway kang Philippine Ambassador to Malaysia Charles Jose.
Mas milanog ang abiba dihang mipaso na si Pacquiao, kanhi 8-division world champion.
Ang inahan ni Pacquiao nga si Dionisia nakahimamat sab kang Matthysse,
“Thank you mommy,” matod pa ni Matthysse ngadto kang Mommy Dionisia.
Si Mommy Dionisia wala mohatag sa iyang panahom kabahin sa away ug igo lang niyang gipahimangnuan si Pacquiao nga mag-ampo ug mag-amping ibabaw sa ring.
Gilaumang kapin sa 100,000 ka mga Pinoy nga naa sa Malaysia ang moabiba kang Pacquiao ning awaya.