KASINGKASING NI PADRE PIO NIA SA CEBU

SuperBalita Cebu - - FRONT PAGE -

Gamit ang iyang walker, nagpaabot si Alfonso Suarez, 61, sa pag-abot sa relic sa kasingkasing ni San Padre Pio sa Cebu Metropolitan Cathedral, dakbayan sa Sugbo, taliwa sa naglagiting nga kainit sa adlaw.

Siya, kuyog ang iyang asawa, ang apil sa liboan ka mga deboto nga nidagsa sa Cathedral ug nangindahay nga maayo ang iyang gihambin nga mga sakit pinaagi sa pagpangaliyupo ug paghikap o pagpaduol sa relic sa tibuok nga kasingkasing sa santos nga gisud og bildo ug gipahimutang duol sa altar sud sa simbahan.

“Maayo unta ang akong mga sakit, mao na ang akong pag-ampo,” paambit ni Suarez, molupyo sa Barangay Hipodromo, siyudad sa Sugbo, dihang nahinabi sa Superbalita Cebu kagahapon.

Sud na sa dul-an duha ka tuig nga siya gi-dialysis gumikan sa problema sa iyang kidney. Siya usa usab ka diabetic ug taas ang iyang pressure sa dugo.

Si Suarez, usa ka mechanical engineer ug kanhi nagtrabaho sa National Power Corporation.

Si San Padre Pio naila nga milagruso kon kinasingkasing ang pagpangaliyupo niini ug maluluy-on ug manggihatagon ug dunay pagbati sa mga tawo nga mangumpisal.

Matod ni Cebu Archbishop Jose Palma ang kasingkasing ni San Padre Pio mao ang kasingkasing nga napuno sa gugma sa Diyos nga nagpakita og daghan kaayong mga milagro.

Gawas sa kaayohan sa sakit, niawhag ang arsobispo sa mga deboto nga mangaliyupo og kabag-ohan sa kaugalingon ug kalinaw nga maoy gipangandoy sa kadaghanan.

Sa iyang wali, gipamulong sa arsobispo nga tukma ang pagbisita sa relics sa tibuok kasingkasing ni San Padre Pio ning panahon nga daghan ang nabalaka sa sunodsunod nga pagpamatay dinhi sa Sugbo sa mga tawo nga gidudahang nalambigit sa gidili nga drugas.

“Atong damgo nga unta dunay kalinaw kay mauwaw kita nga cradle of Christian civilization kaysa community diha ang pagpamatay,” dugang ni Palma nga maoy nangulo sa misa sa pagabot sa relic sa santos.

Sigon niya makahuluganon ang pagbisita sa relic ni San Padre Pio dinhi sa Sugbo kay gisaulog niadtong Septiyembre 20 ning tuiga ang ika100 ka tuig nga pagtumaw sa stigmata sa santos nga dunay lima ka mga samad sa iyang lawas sama kang Kristo.

Gihandum usab ang ika-50 nga anibersaryo sa kamatayon niini niadtong Septiyembre 23, 2018.

Ang arsobispo nalipay sa liboan ka mga tawo nisugat ug nilinya og taas aron makakita, makapaduol, makahikap ug makahawok sa relic sa tibuok kasingkasing ni San Padre Pio.

Niabot na sa mga dalan D. Jakosalem ug Legaspi ang kataas sa linya sa mga tawo nga gusto mosud sa Cathedral alang sa relic sa santos.

Karong udto dad-on ang relic sa IEC Pavilion sa Barangay Mabolo, dakbayan sa Sugbo human sa alas 10:30 sa buntag nga farewell mass sa Cebu Metropolitan Cathedral nga pangulohan ni Msgr. Ruben Labajo, team moderator sa Cathedral.

Hangtod sa Dominggo sa kaadlawon magpabilin ang relic ni San Padre Pio sa IEC Pavilion ug dad-on kini sa siyudad sa Davao human sa farewell mass sa alas 6:00 sa buntag nga pangulohan ni Cebu Auxiliary Bishop Dennis Villarojo.

Ang Pilipinas maoy ikaupat nga nasod ug kinadaghanang mga adlaw nga gibisita sa relic sa santos. Unang naduaw ang Estados Unidos sud sa 10 ka adlaw, Paraguay 8 ka adlaw ug Argentina sud sa lima ka adlaw.

Dinhi sa Pilipinas sud sa 21 ka adlaw ang iyang pagduaw diin ang Sugbo ang usa sa mga dapit nga gibisita.

/ ALEX BADAYOS

■ KASINGKASING: Gidawat ni Cebu Archbishop Jose Palma (nag-atubang) ang kasingkasing ni San Pedro Pio nga miabot dinhi sa siyudad sa Sugbo kagahapon.

Newspapers in Tagalog

Newspapers from Philippines

© PressReader. All rights reserved.