P3.3M shabu nasakmit; 15 nadakpan

SuperBalita Cebu - - BALOR SA KUWARTA - / AYB & GPL

Pag-umangkon ni Rowen Secretaria, alyas Yawa, kinsa giilang bigtime drug lord sa Sugbo ug Bohol nga napatay sa anti-drug operation kapin sa duha ka tuig na ang nakalabay, nasikop sa buy-bust operation.

Mokabat sa P3 million sa gituohang shabu ang nasakmit sa kapulisan.

Ang nasikop giila nga si Piel Secretaria 19, taga Ermita, siyudad sa Sugbo, kinsa nakuhaan og 260 gramos nga gituohang shabu.

Matod ni Chief Insp. Regino Maramag, hepe sa Pardo police station, nga aduna silay unang nadakpan nga maoy nitug-an kon asa siya magkuhaan og supply sa illegal nga drugas.

Ila dayon nga giplanohan ang pagpahigayon sa entrapment ug buybust operation pasado ala una sa milabayng kaadlawon.

Nakig-alayon una sila sa Carbon police station aron hapsay ang pagdakop sa suspek.

DRUG DEN

Samtang P300,000 kapin sa gituohang illegal drugs ug 14 ka tawo nasikop sa buybust operation kagahapon sa hapon sa Sitio Mananga, Brgy. Tabunok, dakbayan sa Talisay.

Si Supt. Marlu Conag, hepe sa Talisay Police Station nga nahinabi sa Superbalita Cebu, niingon nga ang ilang operasyon inabagan sa mga sakop sa Philipine Drug Enforcement Agency (PDEA7).

Si Conag nagkanayon nga taudtaud nilang gimonitor ang dapit nga niresulta sa pagkasikop nila ni Elissa Alisoso, 53; Vangie Quiñones, 33 ug Leonardo Juarez, 38 ug 11 ka mga tawo.

Ang tulo maoy nagpadagan sa ilegal nga drugas ingon man sa drug den.

Newspapers in Tagalog

Newspapers from Philippines

© PressReader. All rights reserved.