Mga magtutudlo, mga tinun-an nabalaka sa liki sa bukid duol sa tunghaan

SuperBalita Cebu - - BALOR SA KUWARTA -

Mga magtutudlo ug tinunan sa Daanlungsod Elementary School sa lungsod sa Tuburan ningreklamo labot sa sama sa naliki nga bukid ibabaw sa ilang tunghaan.

Nahadlok sila nga modahili kini ug matabunan na hinuon ang tunghaan samtang sila nagklase.

Gipaabot na nila sa barangay ingun man sa local nga kagamhanan sa Tuburan, sa Kapitolyo ug sa Mines and Geosciences Bureau (MGB) ang maong reklamo aron mahatagan kinig pagtagad ug dili mahisama sa nahitabo sa siyudad sa Naga.

Nag-post sab sila bahin niini diha sa social media aron mas madungog o makita ang ilang sitwasyon sa kadaghanan.

Ang Provincial Disaster Risk Reduction and Management Office kauban ang mga tinugyanan sa Provincial Engineering ug local DRRM sa Tuburan nihimo na og assessment sa maong dapit niadtong Martes ug ilang nasuta nga dili kini mugna sa usa ka quarry operation.

Sigun sa information management staff sa PDRRMO, Rhee Telen Jr., dunay gitukod nga Technical-Vocational Center ang Kapitolyo sa ibabaw nga bahin sa bukid ug ang mga nidahili nga anapog gikan sa gipatag nga dapit.

Makita ang daw liki sanglit nahimo kining kanal nga agianan sa tubig panahon nga mo(ulan. Apan giklaro niya, walay sinyales nga mohulpa o modahili ang yuta gikan sa babaw.

Kabahin sa plano sa tukoron nga tech-voc center ang pagbutang usab ug retaining wall nga mopugong sa yuta nga modahili paubos.

Sa assessment nga gihimo sa PDRRMO, gitug-an ni Telen nga mga 50 ngado sa 100 meters pa ang distansiya sa residential area gikan sa tiilan sa bungtod, nga maoy gireklamo nga nidahili.

Nalipay na lang ang PDRRMO sa pagpakabana na karon sa mga tawo labot sa posibleng risgo diha sa ilang dapit aron usab dali kini nga mahatagan og pagtagad samtang wala pay nahitabo nga katalagman sama sa nahitabo sa Naga.

Hinuon, ang PDRRMO padayong nag-awhag sa publiko na magpakabana.

Newspapers in Tagalog

Newspapers from Philippines

© PressReader. All rights reserved.