Mahunong pa kaha?

SuperBalita Cebu - - EDITORYAL -

Maghilak na ang adlaw nga way patay dinhi sa Metro Cebu. Maorag normal na lang nga dunay patyon sa Cebu kada adlaw. Maorag ang normal sa Cebu mao ang adlaw nga way patyon. Ang nakapait, sa 10 ka mga kaso, maayo lang og dunay usa nga nadakpan. Ang labing uwahi nga biktima sa pagpatay mao ang usa sa mga kanhi barangay kapitan sa dakbayan sa Mandaue. Kon magpadayon ang trend, sa di pa matapos ning buwana, moabot na og 30 ang gipatay sa mao nga dakbayan. Kon daghan sa Mandaue, unsa na kaha sa dakbayan sa Sugbo, Talisay ug ubang mga dapit sa Sugbo?

Ang mas pait kay daghan sa mga Sugboanong miabiba, mipakpak labina kon ang usa ka biktima nalambigit sa illegal drugs. Alang nila mas maayo pang ang mao nga tawo maoy patyon kay sa may makapatay sa mga inosente. Kon dunay mapagan nga inosente, ingnon lang colateral damage.

Naay balaud ug dunay kapulisan nga ang trabaho mao ang pagpatuman sa mga balaud sa nasod. Trabaho usab nila ang pagpaniid, pagdakop, pagtigom og mga ebidensya ug pagtaral sa hukmanan ning mao nga mga tawo. Duna kitay proseso nga gisunod kay mao kini ang usa sa mga importanteng haligi sa sibilisadong katilingban.

Bisan ang dagkong mga opisyal sa kagamhanan dinhi sa Sugbo way nahimo. Ang ilang komentaryo kutob ra sa alarming ug uban pang huyang nga mga estorya.

Ang kadagkuan usab sa simbahang Katoliko igo ra sa pag-ampo, way makitang konkretong lakang. Nahanaw na tong mga adlaw diin ang mga Sugboanon magkahiusa sa paghimo og mga lakang batok sa mga hitabo nga di na maayo ug hulga sa kalinaw.

Pun-an pa sa kamabaw sa imbestigasyon sa kapulisan ning mao nga mga hitabo. Kon di mangisog ang kadagkuan sa Sugbo ug mohimog konkretong lakang, magpadayon ang mga patay ning dapit nga duyan unta sa Kristiyanismo.

Newspapers in Tagalog

Newspapers from Philippines

© PressReader. All rights reserved.