100 WA KAKUHA SA 'CARD'

SuperBalita Cebu - - FRONT PAGE -

Kapin sa 100 ka operators sa public utility jeepney (PUJ) sa Central Visayas ang dili kwalipikado nga mokuha sa P5,000 nga fuel subsidy cards sa Land Transportation Franchising and Regulatory Board pinaagi sa Land Bank of the Philippines.

Si LTFRB 7 Director Eduardo Montealto Jr. nibutyag nga dili makadawat ang maong operators kay wa makapangan nila ang mga prangkisa nga maoy narehistro sa ilang buhatan nga apil sa mga makadawat og P5,000 fuel subsidy gikan sa gobiyerno.

Ang nahitabo, matod niya, dihang nipalit ang maong operators og second hand nga PUJ units, nakapangan pa sa kanhi mga tag-iya o operators ang mga prangkisa niini.

Gidugang ni Montealto nga himoan pa og resolusyon sa ilang ulohang buhatan sa LTFRB kon unsay angay nga buhaton bahin niini.

“Gawan pa nila ng resolution doon sa central office kung i-allow ba ‘yung present owner,” pasabot sa director dihang nahinabi sa Superbalita Cebu kagahapon.

Apil sa resolbahon sa ulohang buhatan kon unsay buhaton sa mga operator nga tua na sa abroad apan apil sa makadawat og fuel subsidy ubos sa Pantawid Pasada Program sa gobiyerno.

Sigon sa ilang talaan, dunay lima ka operators sa rehiyon ang tua na sa laing mga nasod ug lain na ang nanag-iya sa ilang prangkisa ug PUJ units.

Si Montealto namahayag nga tapukon una sa central office ang tanang report sa mga rehiyon kabahin sa distribusyon sa unang batch sa cards ug kon dunay sobra nga pundo posible maapil ang mga operator og multicabs ang mahatagan usab og ayuda.

Hangtod sa Biyernes, kapin pa lang sa 1,900 PPP cards ang nakuha sa mga operator sa PUJ sa Central Visayas gikan sa 5,354 cards nga apil sa unang batch nga nadawat sa LTFRB 7 niadtong Agusto ning tuiga.

Matag card, adunay sud nga P5,000 nga balido hangtod sa Disyembre 31 ning tuiga nga magamit sa pagpatubil sa gi-authorize nga gas stations.

Newspapers in Tagalog

Newspapers from Philippines

© PressReader. All rights reserved.