Hapak

Kaniadto, kon ang duha ka mga batang lalaki mag-away ug magsinumbagay sila, may mopataliwala dayon sa duha, unya ipahangad ang pad, ug moingon: “Hapak”. Ang mohapak, sa ato pa, andam makigsinumbagay. Panalipdan niya iyang bili atubangan sa ubang mga bata. Ang dili mohapak masugsugan og “putig itlog” kun talawan. Dili mahimong magpalaban sa uban kay imong kining personal nga tulobagon.

“Pagmaisog kamo! Ako kini. Ayaw kamo kahadlok,” nagkanayon si Jesus atubangan sa iyang mga tinun-an sa dihang naaan siya nga multo nga naglakaw ibabaw sa katubigan. Nangahas si Pedro ug mihangyo siya nga makalakaw pod ibabaw sa katubigan padulong kang Jesus. Tungod sa mando ni Jesus nga “Dali”, nakalakaw siya. Ang kaisog nga nabatonan ni Pedro nag-agad sa iyang pagpamati sa mga pulong ni Jesus ug pagsudong sa iyang panagway taliwala sa kalandrakas.

Sagad, isog kita kon sa atong tan-aw mapildi nato ang atong kontra. May paisog-isog pod kay magpalaban dayon. Mahimo sad nga nahinaykan tungod sa tukmod gikan sa uban ug dili buot matawag nga talawan.

Lahi ang kaisog nga gibati ni Pedro. Mainiton, madilaabon, madasigon kini. Ang maong kaisog gikan sa kahiladman nga dinasig sa Dios. Mao kini ang nahitabo sa panahon sa Pentekostes. Nahimong isog ang mga kanhiayng talawan nga mga apostol ug uban pang sumosunod ni Cristo human mikunsad ang Espiritu kanila. Tungod sa Espiritu nga mibaton sa hulagway sa mga dila sa

Binasi sa 1 Hari 19:9-13; Salmo 85; Taga-Roma 9:1-5; Mateo 14:22-33 kalayo, nadawat sa mga disipulo ang buhing presensya ni Jesus ug milanog sa ilang kahiladman ang iyang mga pulong: “Pagmaisog; ako nang nabuntog ang kalibotan”.

Aron molahutay sa maong kaisog – nga gisimbolo sa pagpadayon og lakaw ni Pedro ibabaw sa katubigan – kinahanglan magpadayon siya og pagpamati sa tingog ug pagsud-ong sa panagway ni Jesus. Wala niya kini himoa ug naunlod siya.

Dili sayon pamation ang tingog sa Dios kay isip tawo mangita kita og tingog nga kanunayng galanog. Apan, sumala pa sa libro sa mga Hari, ang Ginoo nagpadayag pinaagi sa “hinay ug malumong tingog”. Apan sa mamati sa maong tingog, mabatonan ang kaisog sama ni Pabro nga miingon sa mga taga-Roma nga Diosnong gugma ang kainit sa kahiladman nga maoy makapaisog kanato. Napuno niini si Pablo. Gani sa iyang kasubo nga wala dawata sa mga Israelita si Cristo, miingon siya nga “palabihon ko nga tunglohon ako sa Dios” aron lamang maapil ang iyang isigka-Judio. Nagmaisog siya sa paglitok sa maong pasulabi aron mapadayag ang iyang gugma sa mga Israelita nga tinukmod sa gugma sa Dios.

Dili na diay kita mistil mohapak kay sagad garbo ang nagpatigbabaw niini. Subay sa hilom ug malumo nga tingog sa Dios, mahimo pod nga hilom ug malumo ang atong kaisog ilabina niining panahon sa pandemya. Mag-alagaray kita sa usag-usag taliwala sa atong mga kahadlok ug kabalaka. Dili kita motalaw.

Ang mahadlokon ug mahigugmaon sa Dios ra ang tinuoray nga isog, di ba?