I don’t want to let this go
Nagkadungan sa pagpamisita nako sila si Raul ug Roel. Kining duha ka suitors nako agrisibo sa ilang love nako. Gipasabot ko na sila nga di magdali-dali kay parehas pa ming nagtungha. Lain-lain ang kurso ug university ang among gitunghaan apan nagkasuod kami kay usa ra man ka lungsod ang among gipuy-an. Ug karon nga wa mi laag-laag tungod aning coronavirus disease, kanunay lang ming magkateksanay.
Klasmet ming tulo sa hayiskol sa among lungsod maong nagkaila ug nagkasuod mi.
Morag gituyo gyud sa kahigayonan kay nagkadungan sab silag pangulitawo nako dihang nag-eskuwela na mi sa college. Karon, second year college na mi. So, kon kuwentahon, almost one year na silang nangulitawo nako.
“You know guys, lisod ang pagpili ninyo. Pulos mo angayan nga akong higugmaon.
But to be honest, nag-agad gyud ko sa pinitik sa akong kasingkasing. Kana bang giingon nga there is something real.”
“Sports man sab ming duha si Roel, Marlene. Kon kinsa namo ang imong sugton, aw, dawaton sa napakyas.”
Naka-smile ko sa akong nadungog gikan ni Raul.
“Mao na ang tinuod, Marlene. Nagkasabot na mi si Raul bahin ana.”
Miyangu-yango ko nga mitan-aw kang Roel. Nakaginhawa kog sagunson. Mga buotan gyud ning duha ko ka suitors. Hilom kong nakaingon. Bisan kinsa tingali kanila ang akong sugton, makaseguro ko nga di ko pasakitan ug pahilakon.
“Moabot ra gihapon ta ana.
Pero sa pagka karon, pasagdi una ko ninyo sa paghunahuna ug pagtugkad sa akong pagbati kon kinsa gyud kaninyong duha ang akong gihigugma.”
Nagkadungan pagtando ang duha.
Nahunong ang among panagsulti dihang misulod sa sala ang among katabang nga nagdala sa among esnak.
“Lisora anang imong sitwasyon, uy, Marlene. Siyaro, sa gidugayon sa ilang pagpangulitawo nimo wa pa gyud kay napili nila?”
Anang pagka ugma nagkaestoryahay mi si Wilda. Nagkakita mi sa merkado sa among lugar. Parehas ming namalit og sud-anon. Hapon adtong tungora. Ako ang nangunay sa pagpamalit sa merkado kay dunay gibuhat ang among katabang.
“Gusto kong maneguro, Wilds.”
Unya Nagpahiyomay mi si Wilda. Nakahibawo ko nga nakagusto siya sa hilom kang Raul. (SUMPAYAN)