Phoenix Suns wa pay pilde

Kon ang NBA restart maoy basehan, ang Phoenix Suns maoy labing lig-on sa 22 ka mga team nga nisalmot sa nagpadayong duwa sa Disney sa Florida.

Human sa makauuwaw nga kapildehan sa defending champ nga Toronto Raptors sa mga kamot sa Boston Celtics,

100-122, ang Suns maoy nagpabiling team nga wa pa makasuway og pilde.

Pinaagi sa pagpangulo sa ilang batan-on nga star nga si Devin Booker, ang Suns adunay 4-0 nga limpyo nga baraha sugod niadtong Hulyo 31 sa Disney World.

Ang gipakita nga performance sa Phoenix daw dili mobanda sa ilang NBA standing nga 30-29 ug nahimutang sa ika-11 nga pwesto sa Western Conference. Lakip sa mga gipangbuntog sa Phoenix mao ang Washington Wizards, Dallas Mavericks, Los Angeles Clippers ug Indiana Pacers.

Ang duha kanila lehitimong contender sa Western Conference. Ang Suns nidaog batok sa Clippers gumikan sa buzzer beater ni Booker atubangan sa tag-as nga kamot ni Kawhi Leonard ug Paul George.

Ang Clippers, Los Angeles Lakers, Milwaukee Bucks nga maoy mga lehitimong contender sa paglangkat sa korona sa NBA adunay 5-6 records batok sa ubang team.

Gumikan sa upat ka sunodsunod nga kadaugan, ang Suns tabla na karon sa ika-11 uban sa New Orleans Pelicans.