Gikan sa 30, 8 na lang nabilin nga Covid-19 positive sa Mandaue police

Gikan sa 30 ka mga nagpositibo sa coronavirus disease 2019 (Covid-19) sa Mandaue City Police Office (MCPO), walo nalang ka mga pulis ang mipailawom sa isolation niadtong Agusto 9, 2020.

Si PCol. Jonathan Abella, hepe sa MCPO, miingon nga sa walo ka aktibo nga kaso, lima sa mga pulis ang naghome quarantine samtang ang tulo ka mga pulis nag-quarantine sulod sa Mandaue City Central isolation Center.

Aron pagsiguro nga luwas ang kapulisan sa dakbayan sa Mandaue batok sa Covid-19, permanenti nga ipaubos kini sa RT-PCR swab test.

Sigon ni Abella nga dili niya ipaubos og rapid testing lang ang mga pulis ug ipaubos gyud kini nila sa swab testing aron mas siguro nga wala kini matapti sa virus labi na sa ilang linya sa trabaho isip frontliner.

Dugang ni Abella nga kanunay sa field ang kapulisan ug usa sila sa mga miyembro sa contact tracing team.

Sa headquarters sa MCPO, wala pa una sila modawat og mga bisita tungod nag-amping aron wala nay laing mataptan sa maong virus.