Ang Tubag ni Maria
Ang ang-ang nga boss, bossing. Sa unang higayon nga may mitawag nakog “bossing” nalain ko kay morag nagbugalbugal. Ang pulong nahimo nang sakop sa atong pang-adlaw-adlaw nga kinabuhi. Usahay may sagol nga katahoran. Usahay sad morag gamiton sa pagpagkig-istorya og tawo nga dili nato kaila.
“Ihatag sa Cesar ang iya sa Cesar ug ngadto sa Dios ang Iya sa Dios,” miingon si Jesus. Mao kini ang kataposang pulong ni Jesus diha sa usa ka yugto kanus-a ang mga batok kaniya, ang mga Pariseo ug mga dumadapig ni Herodes, naghimo og lit-ag para dakpon si Jesus sa iyang mga pulong. “Subay ba sa balaod ang pagbayad og buhis sa Cesar o dili?” Kon motubag siya og “oo” hikuntrahan siya sa mga relihiyosong Judio nga miila nga ang hulagway sa emperador (“ang
Cesar”) sa salapi pagsimba sa diosdios. Kon “dili”, mahimong isumbong si Jesus sa mga Romanhon isip usa ka rebelde.
Apan dili “oo” o “dili” ang tubag ni Jesus. Gibali niya ang kahimtang. Gipangutana niya ang nangutana kaniya mahitungod sa larawan sa Cesar didto sa sensillo nga gitawag og denaryu. Kon ang larawan sa Cesar maoy gikulit sa kuwarta, kang Cesar ang maong kuwarta nga gigamit sa mga Judio. May natad diay sa kinabuhi nga iyaha sa emperador, may natad nga iyaha sa Ginoo. May obligasyon kita sa matag usa niini.
Apan, sa tinuoray, ang Ginoo mao ang tinuoray nga “Boss”, kon ang gipasabot niini siya ang tigdumala sa tanan, ug ang emperador usa ka “bossing”. Ang iyaha sa emperador mao ang natad sa pagdumala sa politika ug pangagamhanan, sa pagumol
Binasi sa Isaias 45:1, 4-6; Salmo 96; 1 Taga-Tesalonica; Mateo 22:15-21 ug pagpalambo sa kaayohan sa kadaghanan. Sa laing bahin, ang Dios tagdumala sa tanang natad sa tawo, lakip na ang pangagamhanan. Kon may panagbingkil tali sa balaod sa Dios ug sa balaod sa tawo, ang sa Dios maoy masunod.
Ang pagkalabaw sa Dios sa tanang mga bossing nagagikan sa tanlag sa tawo kun iyang konsiyensiya. Tingog kini sa Dios nga nagamando nga likayan ang ngil-ad ug himuon ang maayo. Anaa sa kahiladman sa tawo ang tanlag. May balaod natural usab sa Dios nga mabasa sa kinaiyahan ug balaod moral nga mogiya sa tawo sa tul-id nga dalan. Mao kining duha ang labing taas nga balaod ug ang dili mosubay niini sayop ang dalan nga gilakwan.
May mga higayon usab diin ang politikanhong bossing gimandoan sa Dios sa paagi nga ang maong lider mismo wala masayod. Gitawag ni propeta Isaias og dinihogan – mesiyas – si Ciro ang hari sa Persia. Gipadala ang maong hari “aron pagbuntog sa kanasoran… aron ang katawhan, sukad sa sidlakan hangtod sa kasadpan, masayod nga walay lain gawas kanako; ako mao ang Ginoo”. Pagkamisteryoso sa plano ug buhat sa Dios!
Gawas sa nahisgutang misteryosong pagdumala sa Dios, nagdumala pod siya sa mga matuohon. Segun sa sulat sa mga taga-Tesalonica, lig-on ang atong paglaom kang Jesucristo ug nasayod kita sa gugma sa Dios alang kanato sa iyang pagpili kanato. Gugma nga walay kinutoban ang gihatag sa Ginoo kanato.
Naa ba kitay gitratar nga bossing nga daw ginoo ug giila na ba nato nga ang Ginoo maoy labaw sa tanan?