Bakuna batok sa dengue, mapalit na!

The Mindanao Examiner Regional Newspaper - - News - (Elvira C. Bongosia)

MAPALIT na karon semanaha ang bakuna batok sa dengue, matud pa ni Department of Health (DOH) Secretary Janette Garin.

Sa Pilipinas lamang gihimo ang tulo ka hugna nga clinical trial alang sa dengue vaccine, indikasyon nga maayo gayud ang mga Pinoy researcher, matud pa ni Garin.

Giingong nigahin og P3 bilyon ang gobyerno sa 2016 national budget alang sa maong bakuna. Gipahayag ni Garin nga sa pagkakaron, taas ang presyo sa dengue vaccine tungod kay ang kumpanyang Sanofi Pasteur lamang ang naghimo niini.

Matud pa nga nahatagan lamang og diskwento ang Pilipinas sa dihang nagpulong ang Department of Finance ug mga executive sa Sanofi sa APEC Summit niadtong Nobyembre.

Ug dugang 34 porsiyento usab ang gihatag human makahinabi ni President Benigno Aquino ang usa pa ka opisyal sa maong kumpanya sa France.

Samtang gi-aprobahan na ni Aquino ang pagdumala sa DOH sa libreng bakuna sa dengue alang sa mga kabos nga estudyante sa mga pampublikong tunghaan nga nahimutang sa mga lugar nga adunay taas nga kaso sa dengue.

Matud pa ni Garin nga ihatag ang libreng bakuna sa dengue sa mga estudyanteng grade 4 taman grade 5 o sa mga batang may edad 9 taman 10 anyos o may kinatibukang 1,077,000 ka bata sa National Capital Region, Region 3 ug 4-A.

Gitakda ang vaccination o pagbakuna sa mga buwan sa Marso ug Setyembre ning kasamtangang tuig. Apan gipasabot sa Kalihim nga kinahanglang ibaligya ang ubang bakuna sa mga pribadong pasyente aron mapondohan ang nahisgotang programa.

Newspapers in Tagalog

Newspapers from Philippines

© PressReader. All rights reserved.