PHIVOLCS: Ayaw tuo sa pagpanghadlok sa social media kalabot sa ‘The Big One’

The Mindanao Examiner Regional Newspaper - - News - Bongosia) (Elvira C.

CEBU - Subling gihimakak sa Philippine Volcanology and Seismology (PHIVOLCS) nga sila ang nagpagawas sa impormasyon kalabot sa pag-igo sa “The Big One” o kusog nga linog dala sa paglihok sa West Valley Fault.

Matud pa ni PHIVOLCS Director Renato Solidum, walay ni bisan kinsa ang makasaulti kun kanus-a mahitabo ang giingong linog tungod kay wala may saktong teknolohiya sa kalibotan nga makatagna kun unsang petsa ug asa mo-igo ang kusog nga pagtay-og.

Ang ila ra gayud mahimo mao ang pagpangandam sa mga earthquake scenarios nga may kalabotan sa mga mahimong epekto sa kusog nga linog aron magamit kini isip giya sa disaster preparedness.

Gipasabot ni Solidum nga walay basehan ang mga nikatap nga impormasyon sa social media nga giingong hinimo sa usa ka grupo nga may gimugnang prediksyon base lamang sa paglinya sa mga planeta.

Nasayran nga molihok ang fault line matag 400 hangtud 600 ka tuig diin ang katapusang natalang linog nga dala niini niadto pang 1658 o 357 ka tuig na ang nakalabay.

Samtang gipasabot usab ni Solidum nga dili pa basehan alang sa linog ang paggawas sa oarfish sa pipila ka parte sa Mindanao sa hinungdang wala pa’y igong pagtuon kalabot niini.

Nipasidaan si Solidum sa mga netizens nga likayan ang pagpakatap sa mga sayop nga impormasyon sa social media tungod kay mahimo kining magmugna og kahadlok ug kabalaka sa publiko.

Newspapers in Tagalog

Newspapers from Philippines

© PressReader. All rights reserved.