Kusho ukuthini ukuhlehla kweNorth Korea?
Emuva kwamasonto amabili lapho bekwakheka isithombe sokuthi impi esekwaphela iminyaka engama-70 yenzeka iyabuya eKorea. Sekuvele izindaba zokuthi iNorth Korea isimise izinhlelo zayo zokwandisa ingcindezi yezimpi kuSouth Korea. Icebo lokwandisa ingcindezi ngokwezempi iqale emuva kokuthi kwande ukungezwani phakathi kwala mazwe kwaze kwaqhunyiswa ngebhomu ihhovisi elisetshenziswa yilawa mazwe ukubamba izingxoxo.
Isinqumo sokumisa lezi zinhlelo siqhamuke emuva komhlangano phakathi komholi waseNorth Korea, uMnu uJong Un, neKhomishini Yezempi ebhekisise kahle isimo phakathi kwala mazwe.
Ngokwemibiko yabezindaba baseNorth Korea, iKorean Central News Agency (KCNA), izinhlelo ezazizothathwa ngezempi kwakuzoba ukuthumela amasotsha eMount Kumgang okuyindawo yezivakashi naseKaeosong lapho okugcwele izimboni futhi okuwumngcele waseSouth Korea.
Kwakuzophinde kufakwe amaphoyisa lapho ayehoxiswe khona endaweni eyaziwa ngeDemilitarized Zone (DMZ) ephakathi kwala mazwe. Kodwa okuvelile ukuthi isizathu sokumisa lezi zinhlelo asivezwanga.
INorth Korea yabeka izinhlelo zokuqinisa ukucindezela iSouth Korea ngezempi ngemuva kokuthi abantu abangavumelani nobuholi baseNorth Korea bathumela amabhelunde ayequkethe amaphepha ayenolwazi lwezinto zangaphandle kwaseNorth Korea. Leliya zwe lathi lesi senzo sibe ukuphulwa kwesivumelwano phakathi komholi walo kanye noMengameli waseSouth Korea, uMnu uMoon Jae-in, esenziwa ngowezi-2018 lapho laba baholi beqala ukuhlangana bavumelana ngokuyeka izenzo ezazingalungile nokuqeda ukudicilelana phansi.
Esontweni eledlule abantu abangavumelani nobuholi baseNorth Korea abahlala eSouth Korea bathumele amaphepha ayizi-500 000 abebhalwe ukuthi “The Truth of The Korean War” okwakuyimpi yala mazwe eyenzeka ngeminyaka ye-1950. Laba baphinde baveza ukuthi bathumele amanye amaphepha angama-500 ayekhuluma ngempumelelo nenqubekela phambili yaseSouth Korea.
Emizamweni yokuziphindiselela emuva kokulethwa kwala mabhalunde iNorth Korea yaqeda konke ukuxhumana okwakuphakathi kwala mazwe yaze yaqhumisa ihhovisi elalisetshenzisa yila mazwe ezingxoxweni zawo elalisenyakatho yendawo IDMZ edolobheni iKaesong. Kodwa leli hhovisi lase livele livaliwe ngenxa yokhuvethe futhi nezisebenzi zaseSouth Korea zazingekho kuleli bhilidi. Ukuqhuyiswa kwalo ngebhomu kuthumele umyalezo ocacile njengoba leli hhovisi bekuhloswe ngalo ukuba libe elokuxoxisana phakathi kweNorth Korea neSouth Korea ukuze kuzogwemeka izingxabano ezingenasidingo.
Emveni kokuthi iNorth Korea isabise ngokuqinisa ukucindezela ngezempi umbutho wamasotsha aleliya lizwe abuyisele izikhulisamazwi emngceleni ohlukanisa la mazwe futhi agcizelela ukuthi nawo azothumela amabhelunde eSouth Korea azobe equkethe imininingwane evuna iNorth Korea.
INorth Korea igcizelele ukuthi izenzo zayo kula masonto edlule bekuwukuziphindiselela eSouth Korea kodwa kuyavela ukuthi seziningi izinyanga leliya zwe lizwakalalisa ukuthi ukuzwana nobudlelwano balo neSouth Korea kanye ne-United States of America (USA) akulethanga mehluko ngenxa yonswinyo olubekiwe eziligqilaza ngokomnotho zisakhona. Kodwa ochwepheshe bathi iNorth Korea isebenzisa lesi simo phakathi kwala mazwe ukuze kudaleke inkinga eyayizokwenza leliya zwe lithole isisekelo ezingxoxweni ezazizoqhamuka.