KWEZINYE IZINGXENYE
EzaseGermany: Uhlelo olujwayelekile lokuboshwa kwabantu abadayisa izidakamizwa edolebheni iStuttgart kuqubule imibhikisho enodlame ngempelasonto edlule. Ngokusho kwabaphathi baleli dolobha. Le mibhikisho ishiye ababhikishi abangama-24 beboshiwe kuthi amaphoyisa ali-19 abelimele. IMeya yaleli dolobha uFritz Kuhn yayigxeka le mibhikisho, yathi lolu dlame olwenzekile kuyinto “engamukelekile” futhi yaphinda yagcizelela ukuseka kwayo ezomthetho. Ekhipha isitatimende uKuhn uthe, “Le mibhikisho isiyeqe umugqa wotshwala kanye neyokuthanda ukubukwa ezinkundleni zokuxhumana, futhi nodlame olubhekiswe kwabezimo eziphuthumayo angeke lubekezelelwe.”
EzaseLebanon: Abangavumelani noHulumeni waleli lizwe babhikishe bagcwala imigwaqo yamadolobha amaningi, babeka izithiyo ezaziphoqa ukuvalwa kwemigwaqo njengoba imali yaleliya lizwe yayiwa ngokukhulu ukushesha. Laba babhikishi bajikijele amasosha ngamatshe kwathi abanye bazama ukweqa uthango olungaphandle kweHhovisi likaNdunankulu enhlokodolobha yakhona iBeirut. Laba babhikishi babebhikisha ngenxa yokuthi basola ubuholi balezwe ngezingqinamba umnotho walelizwe obhekene nazo. Umgwaqo omkhulu osogwini wawuvalwe ngamathayi ashayo enyakatho naseningizimu yenhlokodolobha, okwakuyizindawo lapho imibhikisho eyayingajwayelekile.
EzaseVenezuela: Inkantolo Ephakeme yaleli lizwe imise ubuholi beqembu eliphikisayo olungaphansi kukaPrimero Justicia. Le nkantolo iphinde yanquma ukuthi leli lizwe kumele liholwe umuntu ohambisanayo nemithetho kaHulumeni. Kuleli sonto iqembu lesibili eliphikisayo i-Acción Democrática nalo limisiwe. Zombili lezi zinqumo zisuselwe ezikhalazweni ezivele kwamalunga ala maqembu axoshiwe. Esontweni eledlule, iNkantolo Ephakeme yaleli lizwe iqoke amalunga amasha oMkhandlu Wokhetho okwakuyisigungu sezikhulu ezinhlanu ezazinikezwe umsebenzi wokuhlela ukhetho kuleli lizwe.
EzaseLesotho: Imibhalo yasenkantolo yakamuva ibika ukuthi loyo owayenguNdunankulu waleli lizwe uMnu uThomas Thabane kanye naloyo onguNkosikazi wakhe uMaesaiah Thabane bakhokhela iqembu lezigebengu imali ukuthi libulale loyo owayenguNkosikazi kaMnu uThabane wokuqala eminyakeni emithathu edlule. UKhomishana wamaphoyisa uPaseka Mokete kwincwadi efungelwe uthe uMnu uThabane wayala ukubulawa kwaNkk uLipolelo Thabane ngenhloso yokuthi loyo ongunkosikazi wakhe uMaesaiah Thabane abe umama wesizwe kuleli lizwe. UNkk wakwaThabane wadutshulwa eduze kwendlu yakhe enhlokodolobha iMaseru ngonyaka wezi2017 ngaleso sikhathi wabe esezingxoxweni zesehlukaniso phakathi kwakhe noMnu uThabane.
EzaseCanada: UNdunankulu wakuleliya zwe, uMnu Justin Trudeau, kuleli sonto uthe isinqumo esenziwe iChina sokubeka ababili baseCanada icala lobunhloli senziwe ipolitiki. Lokhu ukusho emuva kokuthi isikhulu saseChina simuxwayise ngokuthi ayeke ukuphawula ngaleli cala. Inkulumo kaNdunankulu ifika nje uMnu uMichael Kovrig noMnu uMichael Spavor babekwe ngokusemthethweni icala lobunhloli nokuphatha izimfihlo zombuso. Baboshwa ngowezi-2018 ngemuva kwesonto kwaboshwa uMnu uMeng Wanzhou owayeyisikhulu sezimali senkampani yaseChina, iHuawei, ngamacala ayefakwe e-United States of America (USA)