Likhulisa intsha elishaya ngesigqi sakudala
Ibhendi yomculo ehlanganiswe amalungu aseLamontvile naseSoweto, iSun Xa Experiment, lizimisele ukwenza umehluko endimeni yomculo ngokufundisa intsha yakuleli ngemvelaphi yawo.
UNks uBuyisiwe Njoko ocula phambili eqenjini nobuye afuthe ivuvuzela uchaza uhlobo lomculo wabo njengeWorld Ancestral Music exube izinhlamvu zeKwaito, iJazz, iGqom, iRock, iDigital Maskandi neTrap.
Okwenza baqhamuke nale ngxubevange ukuthi bahabule ezitayeleni zezinkakha ezifana noSun Sun Ra, uBaba uNdikho Douglas Xaba noMama uBusi Mhlongo.
USun Ra wase-USA wayengumqambi wezingoma zeJazz, umdlali wopiyano nembongi.
UXaba waseMgungundlovu wayenamakhono ahlukene njengoba wayekwazi ukukhanda insimbi yokudlala, umqambi, uthisha nomlingisi. UMhlongo waseNanda wayeshaya uMbhaqanga, iSoul, iSmooth Jazz neSoft Rock
“Thina sithunywe abaphansi ukuthi sitshele intsha yakithi igcine okungokwethu futhi sazi ukuthi siqhamukaphi. Umculo wethu opholile ungowesintu ubuye uxube nesilungu. Uxoxa indaba ngokwenzakayo ezindaweni esihlala kuzo. Awukhethi bala lamuntu. Kulukhuni ukuwuchaza kahle ngoba abanye bathi sizwakala sengathi siyiqembu le-Afro Pop noma le-Avant Garde,” kuchaza uBuyisiwe othi igama labo lisuselwa esilungwini nakwiKhoisan.
USun usho ilanga bese kuthi uXa usho u-“out” ngolwimi lwamaKhoisan.
Indlela elihloba ngayo uma lisesiteji iheha iso njengoba amalungu ezipende ngokumhlophe ebusweni nasemzimbeni.
Bathi lolu wuphawu lwendlela abakhombisa ukuthi sebeyihambile njengoba beqale ukuhlangana ngowezi-2014.
Kwezinye izingoma bavamise ukubonakala beshisa impepho uma benandisa, okwenza othamele kumcacele ukuthi sekuthintwa amathongo manje.
Baqala beziculela ezindaweni zokuthokozisa abantu wazaleka kanjalo umbono wokuhlanganisa iqembu.
Amanye amalungu oTebogo Mkhize oshaya i-Acoustic Guitar noBass, uLerato Seitei (electric guitar nobass), uBenedict Watte (percussion), uMusa Zwane (bass guitar), uSiphiwe Mgidi (drums) noKaro Morole ongumdansi obuye alekelele ngamazwi. UBuyisiwe ocula phambili udlala umasingana namashakes
Kulo nyaka beliqala ukukhipha umucu wokuqala osihloko sithi Bayede nobukwa kakhulu kuYouTube.
Yize izinto eziningi zimile ezweni ngenxa yokhuvethe leli qembu aliphelanga mandla njengoba lisanda kukhipha i-albhamu ephelele esihloko “Umculo Umuthi”.
“Kusilimazile ukubheduka kwalesi sifo ngoba ngabe kuningi esikwenzile kodwa-ke bekumele silandele imiyalelo kaHulumeni. Le albhamu ephekwe uRuben Tomas weLYD Productions eGillits maphakathi noMbasa noNhlaba. Iqukethe izingoma eziyisikhombisa kodwa okwamanje isatholakala ezinkundleni ezifana neBootcamp. Esikufisayo ukuthi umyalezo esiwuthumelayo usabalale i-Afrika yonke,” kusho uBuyisiwe.
Ngaphandle kokunandisa leli qembu liyazinika isikhathi sokutshala imbewu entsheni eqala eminyakeni eli-8 enothando lomculo. Kuhanjelwa nezikole nemiphakathi kusetshenziswana nezinhlangano ezingenzi nzuzo kukhishwa iziyalo zokubaluleka ukuziphatha, ukuhlonipha, kanye nokukwazi ukuzimela.
Selibuya ngisho naseMzumbe naseXopo lifundisa izingane ukudlala iziginci, ukudansa nokucula kanye nokuzivocavoca
Kule minyaka ligudla iqembu lithi lifunde lukhulu lishiyelana inkundla nabaculi abaningi esebemkatshubomvu abanjengoMadala Kunene, uRingo Madlingozi, uThandiswa Mazwai noNduduzo Makhathini.