Isichithile isicelo seDA kwelesibonelelo kwezamabhizinisi
Selokhu uMengameli wezwe, uMnu uCyril Ramaphosa, amemezela imvalelwakhaya ngoNdasa nonyaka, sezibe ziningi izigameko zokuyiswa kukaHulumeni ezinkantolo nokusatshiswa ngazo yilabo abangahambisani nemigomo yeminye imithetho yokhuvethe ebekiwe.
Abanye balwela ukuthi amabhizinisi abo avulwe ngokugcwele kanti ngakolunye uhlangothi kukhona abafuna ukuthi imikhiqizo yabo ivuleleke ikuba idayiswe ezitolo njengoba ibivaliwe ngenxa yemizamo yokunqanda ukubhebhetheka kwalolu bhubhane.
Phakathi kwasebeke basabisa uHulumeni ngezinkatolo kubalwa inyunyana yothisha i-Educators Union of South Africa (Eusa) eyayifuna ukuvimba izinhlelo zikaHulumeni zokuvulwa kwezikole mhla lulunye kuNhangulana wezi-2020. Inhlangano iHelen Suzman Foundation nayo yaya eNkantolo YoMthethosisekelo ifuna uthi le Nkantolo iphoqe iPhalamende ukuba lisebenzise amandla alo akuMthethosisekelo. Yayikhala ngokuthi selokhu kwamenyezelwa isimo senhlekelele ezweni amandla ePhalamende asebekwe ezandleni zikaNgqongqoshe Wezokubusa Ngokubambisana Nezindaba Zobuholi BoMdabu, uDkt uNkosazana MaDlamini Zuma, nasemkhandlwini obhekelele ukhuvethe, iNational Coronavirus Command Council (NCCC).
Olunye udaba oluseNkantolo Enkulu yaseNorth Gauteng olweFair Trade Independent Tobacco Association (FITA) ekhala ngokuthi ukungavunyelwa kokudayiswa kukagwayi akukho emthethweni futhi akuwakhi umqondo.
Ngaphezu kwalokhu iNkantolo Ephakeme kuleli inqume ukuthi eminye yemithetho yemvalelwakhaya ayihambisani noMthethosisekelo wezwe.
NgoLwesihlanu zili-19 kuNhlangulana wezi-2020 eNkantolo Ephakeme eGauteng abehluleli beholwa nguMehluleli uDustan Mlambo, bachithe isicelo seqembu eliphikisayo iDemocratic Alliance (DA) ebifuna ukuba uNgqongqoshe Wokuthuthukiswa
Kwamabhizinisi Amancane, uKhumbudzo Ntshavheni, amise ukusebenzisa uhlelo lweBroad-Based Black Economic Empowerment (BBBEE), ubuhlanga, ubulili, iminyaka yobudala noma ukukhubazeka ukuhlonza ofanele ukuthola usizo lwemali ukwelekelela abakhahlanyezwe ukhuvethe.
INkantolo iphinde yanquma ukuthi indlela esentshenzisiwe ukuqoka abafanelwe ukuthola lolu sizo ngaphansi kweDebt Finance Scheme neBusiness Growth Resilience Fund ayikho emthethweni futhi yayibeka eceleni ngoba kayicacile.
Iyalele uNgqongqoshe uNtshavheni ukuba abhale kabusha imithetho eshoyo ukuthi ngubani ofanele ukuthola lolu sizo lwemali kulezi zikhwama. INkantolo inqume ukuthi uNgqongqoshe abufake ubuhlanga emithethweni ezobhalwa kabusha okuyinto ephikisanayo nalokhu obekufunwa yiDA.
UMehluleli uMlambo uthe:
“Ekwakhiweni kabusha kwendlela ezosetshenziswa ukwaba imali yoxhaso ngaphansi kweDebt Finance Scheme noma iBusiness Growth Resilience Fund, uNgqongqoshe kufanele abubheke ubuhlanga, ubulili, intsha nokukhubazeka.”
INkantolo ikuchithile obekushiwo yiDA ukuthi isinqumo sikaHulumeni sokusebenzisa indlela yoguquko ukuhlonza abathola uxhaso lwemali iphambene nomthetho.
Enye ingxenye yesinqumo seNkantolo ifundeka kanje: “Ukubheduka kokhuvethe eNingizimu Afrika kubeke obala ukwahlukana emphakathini wethu okudalwe ukucwaswa ngokobuhlanga, ubulili nezinye izindlela.”
Isinqumo siqhube sathi uma ngempela kunesidingo sokubheka ukubaluleka kosekwadlulwa kukhona nokwahlukana ngokobuhlanga kule Ningizimu Afrika yawo wonke umuntu nokuthi abahlwempu okungaboHlanga bazidinga kangakanani lezi zinsinza ezincane ezikhona, akungabhekwa kude kodwa kulabo abakhahlanyezwe ukhuvethe.
Obemele iDA, u-Adv uSteven Budlender, utshele iNkantolo ukuthi asikho isidingo sokuthi kusetshenziswe ubuhlanga njengendlela yokuqoka okufanele bahlomulo oxhasweni lwemali lukaHulumeni.
Esitatimendeni esifungelwe uNgqongqoshe uNtshavheni, utshele iNkantolo ukuthi ubuhlanga, ubulili, iminyaka yobudala nokukhubazeka kuyizinkomba zokungabhekelelwa ngesikhathi esedlule nesamanje.
Nokho iNkantolo ayigculisekanga ngendlela esetshenziswe uNgqongqoshe ukuhlonza abafanelwe ukuthola lolu xhaso.
Kulokhu isinqumo sifundeka kanje: “Kusezandleni zikaNgqongqoshe ukuqinisekisa ukuthi indlela ezosetshenziswa ukwaba uxhaso lwemali yomphakathi ayinhlanhlathi bese ibeka ngokungacacile ithi kuzobekwa phambili abesifazane, intsha nabakhubazekile.”
Ithe okushiwo uNgqongqoshe ngaphandle kokulawulwa okumenze wafinyelela kule ndlela yokuqoka abafanelwe ukuthola uxhaso yehlulekile ukulandela uMthethosisekelo wezwe. Ngaleyo ndlela iNkantolo inqume ukuthi le ndlela ibuyekezwe, ibekwe eceleni futhi yayibeka njenge ngahambisani nomthetho.
“Isinyathelo esifanele le Nkantolo engasithatha ukuthi iyibeke eceleni le ndlela futhi iyibuyisele kuNgqongqoshe ukuba enze imithetho emisha lapho okulindeleke ukuba abheke iqhaza lobuhlanga, ubulili, intsha nokukhubazeka ekwakheni indlela ezosetshenziswa ukwaba lolu xhaso lwemali ngaphansi kwalezi zikhwama zombili, iDebt Finance Scheme neBusiness Growth Resilience Fund,” kuyalela isinqumo seNkantolo.
Kodwa iNkantolo ithe lesi sinqumo asiluthinti uxhaso obese lukhishiwe.
- nguSabelo Mbatha