Bobbejane maak moles in Eden

Groot bobbejaantroppe het die afgelope weke weer amok gemaak in Eden, ‘n woonbuurt van George.

By twee geleenthede het hulle slaags geraak met die Jack Russell en Labrador van die Mocke-gesin. Beide honde moes by die veearts steke kry vir bytwonde.

Verlede week was daar ‘n herhaling van die drama toe Bubbles, die gesin se Jack Russell, sy gebied probeer beskerm het. Deon en Kobie Mocke van Bokmakieriestraat is raadop met die kese wat al hul hele tuin uitgeroei het. “Ons plant nie meer groente of vrugte nie.”

Boonop raak dinge intens op Vrydae, want die bobbejane hou die woonbuurt dop en weet dus wanneer huishoudelike afvalsakke op die sypaadjies staan en dit is vir hulle ‘n gulde geleentheid om oorskietkos te aas. Daar was al onderonsies tussen hulle en die mense wat in die vullissakke krap.

“Dit sou snaaks gewees het, maar dit is eintlik tragies dat beide partye so desperaat is vir kos,” vertel die Mockes wat naby die beboste grense van die dorp, en dus die bobbejane se habitat, woon.

CapeNature se Carlo van Tonder het inwoners weereens daaraan herinner dat afvalbestuur van kardinale belang is.

“Ons het al telkemale inwoners daaraan herinner dat hulle die geleenthede vir bobbejane om kos te vind moet verminder en daar gepoog moet word om dit amper heeltemal uit te skakel om konflikte te vermy.

“Dit sluit in die plasing van honde- sowel as voëlkos waarop die bobbejane afkom.

“Hou hondekos binne; plaas die sakke uit op die laaste nipper net voor dit opgelaai word deur die munisipaliteit en maak jou asblik moeilik om om te gooi of oop te maak - bobbejane is uiters intelligente diere.”

Eden het ook gereelde besoeke ontvang van ‘n bosbok oor die afgelope twee weke. ‘Bossie’ is gefotografeer en betrag deur inwoners wat gefassineer is deur sy rustige manier van weiding soek in oop erwe.

Daar was al onderonsies tussen hulle en die mense wat in die vullissakke krap.

Die honde van Kobie en Deon Mocke het deurgeloop in gevegte met bobbejane. Bubbles die Jack Russell (links) bly egter onverskrokke en Ike die Labrador (regs) is ook nou aan die herstel. Die Schnauzer Jackie (middel) is egter erg getraumatiseer deur die...

Foto’s: Pauline Lourens Die bosbok verras Eden-inwoners met gereelde besoeke. Die sappige gras in Kersoogstraat is ‘n aantrekkingskrag vir ‘Bossie’. Die inwoner (regs) het sy hond veiligheidshalwe onder sy arm gehou aangesien bosbokke bekend staan vir hulle skerp horings...