OORTYD ‘n krisis vir raad
Reusebetalings aan oortyd vir munisipale werkers en amptenare het veroorsaak dat 43% van die huidige finansiële jaar se oortydbegroting reeds binne die eerste twee maande gebruik is.
Indien George-munisipaliteit op hierdie trant voortgaan sal hulle oor 'n 12-maande periode die begroting vir oortyd met meer as R23 miljoen oorskry. Van die redes wat vir hierdie krisis aangevoer word, sluit in talle ongevulde munisipale poste, 'n vloot van stukkende vragmotors vir vullisverwydering en burgerlike onrus.
Volgens 'n analise wat van 1 Julie tot 31 Julie 2017 gedoen is, sal die oortydbetalings, volgens die huidige trant, oor 'n jaar tot R38 541 091,08 beloop. Hierdie bedrag oorskry die begroting met R23 518 551, 08. Die vooruitskatting is gedoen volgens oortyd in Julie, wat in Augustus betaal is. Die oortydbegroting vir 2017/2018 is 'n rapsie meer as R15 miljoen.
George-burgemeester, Melvin Naik, het tydens die raadsvergadering verlede Woensdag 'n beroep gedoen op elke direkteur, waarnemende direkteur, senior bestuurder en lynbestuurder om oortyd verantwoordelik te bestuur.
Die direkteur van gemeenskapsdienste, Walter Hendricks, se kommentaar is in die agenda vervat. Hendriks het bevestig dat oortyd weekliks tydens bestuursvergaderings bespreek word. Oortyduitbetalings vir vullisverwydering en die skoonmaak van strate (wat onder die departement ressorteer) sal die begrote bedrag volgens die vooruitskatting onderskeidelik met
R6 419 395,88 en
R1 104 662,36 oorskry.
"Dit word egter baie moeilik om oortyd te bestuur tydens burgerlike onrus en normale diensleweringstye na oortyd verleng moet word," het Hendricks gesê.
"Die onlangse Thembalethu-onrus is maar een voorval. Dertien van ons vullisvragmotors is buite werking en wag op herstelwerk."
"Ons het die vlootbestuurder versoek om druk op ons diensverskaffers te plaas om herstelwerk te voltooi. Die effek van
Indien George-munisipaliteit op hierdie trant voortgaan sal hulle oor ‘n 12-maande periode die begroting vir oortyd met meer as R23 miljoen oorskry.
'n uitgeputte vloot is dat ons in skofte moet werk om doeltreffende en effektiewe dienslewering te verseker." Hendricks het gesê sy departement gaan 'n verslag by die Artikel 80-komitee indien oor 'n ernstige tekort wat hulle te wagte is vir die 2017/18 finansiële jaar.
Munisipale woordvoerder, Chantel Edwards-Klose, het by navraag gesê die huidige vakaturekoers en die beskikbare begroting vir die vul van vakatures kan 'n toename in oortyd tot gevolg hê.
"Volgens onlangse rekords het die departement siviele ingenieurswese die afgelope aantal jare personeeltekorte van tot 50% ervaar," het sy gesê. "Ons is tans besig om die begroting vir die 2018/19 finansiële jaar saam te stel en die vakante poste op die goedgekeurde organogram sal vir finansiering voorgelê word, waarna dit gevul sal word. Die diensvlakke van die munisipaliteit word ook hersien om te verseker dat 'n personeeltekort nie die standaard van dienste in gevaar stel nie.
Die werwing- en keuringsproses vir die vul van vakatures sal so spoedig moontlik afgehandel word, in ag genome die beskikbaarheid van die rolspelers. Die vul van die betrokke vakatures word as krities beskou."
* The current overtime expenditure trend indicates that there will be a projected overspending of R 23 518 551, 08 for the current 2017/2018 financial year, if allowed to continue. Directors were urged to manage their overtime budget so that no unauthorized expenditure is incurred.